FSSAI کا بڑا ایکشن، بیکانیر والا، کنڈر جوائے اور سفولا آئل سمیت کئی برانڈز کو نوٹس

نئی دہلی:(اردودنیا.اِن/ایجنسیز)فوڈ سیفٹی اینڈ اسٹینڈرڈز اتھارٹی آف انڈیا (FSSAI) نے ملک کے کئی معروف فوڈ برانڈز کے خلاف کارروائی کرتے ہوئے بیکانیر والا، میریکو لمیٹڈ، فیررو انڈیا اور دیگر فوڈ کمپنیوں کو نوٹس جاری کیے ہیں۔ یہ نوٹس مبینہ طور پر گمراہ کن دعوؤں، لیبلنگ کی خلاف ورزیوں، مصنوعات کے اشتہاری دعووں اور صارفین کی شکایات کے بعد جاری کیے گئے ہیں۔

فوڈ ریگولیٹر کے مطابق متعلقہ کمپنیوں سے وضاحت طلب کی گئی ہے اور انہیں ہدایت دی گئی ہے کہ وہ ضروری اصلاحی اقدامات کریں اور مقررہ مدت میں جواب جمع کرائیں۔

بیکانیر والا کے خلاف صارف کی شکایت

ایف ایس ایس اے آئی نے بیکانیر والا کو ایک صارف کی شکایت کے بعد نوٹس جاری کیا۔ شکایت میں الزام لگایا گیا تھا کہ کمپنی کے ایک آؤٹ لیٹ پر ملازم آپریشنل اوقات کے دوران سروس یا کچن ایریا میں کھانا کھاتا ہوا دیکھا گیا۔

ریگولیٹر کا کہنا ہے کہ یہ واقعہ صفائی اور حفظان صحت کے اصولوں پر سوال اٹھاتا ہے۔ کمپنی سے اندرونی تحقیقات، ملازمین کے حفظان صحت کے پروٹوکول اور اٹھائے گئے اصلاحی اقدامات کی تفصیلات طلب کی گئی ہیں۔

پیرام ڈیری پر آلودگی کا الزام

پیرام ڈیری کو بھی نوٹس جاری کیا گیا ہے۔ صارف کی شکایت کے مطابق آئی آر سی ٹی سی کی کیٹرنگ سروس کے ذریعے فراہم کی جانے والی دہی اور ربڑی میں فنگس پائی گئی۔

اتھارٹی نے کمپنی سے سپلائی چین، انوینٹری مینجمنٹ اور ایکسپائر مصنوعات کی فروخت روکنے کے لیے اختیار کیے گئے اقدامات کی مکمل رپورٹ طلب کی ہے۔

سفولا ہارٹ پرو آئل کے دعوے زیر سوال

میریکو لمیٹڈ کے Saffola Total Heart Pro Multi Source Cooking Oil کے خلاف بھی نوٹس جاری کیا گیا ہے۔

ایف ایس ایس اے آئی کے مطابق "ہارٹ پرو” نام اور دل کی علامت صارفین کو یہ تاثر دے سکتی ہے کہ اس آئل کے استعمال سے براہ راست دل کی صحت بہتر ہوتی ہے، جبکہ ایسے دعوؤں کے لیے سائنسی ثبوت درکار ہوتے ہیں۔

اتھارٹی نے "Good Fats Balance” اور "Losorb for Less Oil Absorption” جیسے دعوؤں کے سائنسی شواہد بھی طلب کیے ہیں۔

کنڈر جوائے کے دعوے پر بھی اعتراض

فیررو انڈیا کی مقبول پروڈکٹ Kinder Joy کو بھی نوٹس ملا ہے۔ ایف ایس ایس اے آئی نے پیکٹ پر درج "Rich in Milk Solids” کے دعوے کو ممکنہ طور پر گمراہ کن قرار دیتے ہوئے وضاحت طلب کی ہے۔

دیگر کمپنیوں کو بھی نوٹس جاری کیے گئے ہیں ان میں میڈیزن لیبز، ماسٹر چاؤ فوڈز، را پریسری، نیکسا انڈسٹریز، اورویل، نیچرل پنیر، سلکن ٹوفو، پلک مینگو فروٹ جوس، کورین جنسنگ اور انسی پرو گولڈ پاؤڈر ونیلا شامل ہیں۔

ایف ایس ایس اے آئی کا کہنا ہے کہ تمام کمپنیوں کو قانون کے مطابق جواب دینا ہوگا اور اگر خلاف ورزیاں ثابت ہوئیں تو مزید کارروائی کی جا سکتی ہے۔