برطانیہ کا مشہور بِلّا ’لیری دی کیٹ‘: 15 سال سے 10 ڈاؤننگ اسٹریٹ کا مستقل مکین

لندن :(اردودنیا.اِن/ایجنسیز)برطانیہ کی سیاست میں گزشتہ 15 برسوں کے دوران کئی بڑی تبدیلیاں آئیں، وزرائے اعظم بدلتے رہے، حکومتیں تبدیل ہوتی رہیں، لیکن ایک شخصیت ایسی بھی ہے جو مسلسل 10 ڈاؤننگ اسٹریٹ میں موجود رہی۔ یہ شخصیت کوئی سیاستدان نہیں بلکہ مشہور بِلّا لیری دی کیٹ LarryTheCat ہے، جو برطانوی وزیر اعظم کی سرکاری رہائش گاہ کا سب سے معروف اور طویل عرصے تک رہنے والا مکین بن چکا ہے۔

لیری دی کیٹ نے حال ہی میں 10 ڈاؤننگ اسٹریٹ میں اپنے 15 سال مکمل کیے ہیں۔ اس عرصے کے دوران وہ چھ مختلف وزرائے اعظم کے ادوار کا گواہ رہا اور بطور "چیف ماؤزر” اپنی ذمہ داریاں نبھاتا رہا۔ برطانوی عوام اور میڈیا میں اس بِلّے کی مقبولیت اس قدر ہے کہ اسے اکثر ملکی سیاست کی مستقل علامت قرار دیا جاتا ہے۔

لیری کو فروری 2011 میں اُس وقت کے وزیر اعظم ڈیوڈ کیمرون اور ان کی اہلیہ سمانتھا کیمرون نے لندن کے جانوروں کے فلاحی مرکز سے گود لیا تھا۔ ابتدا میں اسے ایک پالتو جانور کے طور پر لایا گیا، تاہم بعد میں اسے باضابطہ طور پر 10 ڈاؤننگ اسٹریٹ کا چیف ماؤزر مقرر کر دیا گیا۔

چیف ماؤزر کا بنیادی کام سرکاری رہائش گاہ میں چوہوں کی موجودگی پر نظر رکھنا اور ان کی تعداد کو قابو میں رکھنا ہے۔ برطانیہ میں یہ روایت نئی نہیں بلکہ 1920 کی دہائی سے وزیر اعظم کی رہائش گاہ میں کسی نہ کسی بلی کو یہ ذمہ داری سونپی جاتی رہی ہے۔

لیری دی کیٹ نہ صرف برطانوی عوام بلکہ عالمی شخصیات کی توجہ بھی حاصل کر چکا ہے۔ مختلف مواقع پر غیر ملکی رہنماؤں کے دوروں کے دوران بھی اس کی تصاویر اور ویڈیوز سوشل میڈیا پر وائرل ہوتی رہی ہیں۔ سابق امریکی صدر ڈونالڈٹرمپ کے دورۂ برطانیہ کے دوران بھی لیری نے میڈیا کی خاص توجہ حاصل کی تھی۔

19 سالہ لیری اکثر 10 ڈاؤننگ اسٹریٹ کے مرکزی دروازے کے باہر آرام کرتے یا گشت کرتے ہوئے دکھائی دیتا ہے، جس کی وجہ سے سیاح اور میڈیا نمائندے بھی اس میں غیر معمولی دلچسپی لیتے ہیں۔ اس کے غیر رسمی فرائض میں سیکیورٹی کا جائزہ لینا، تاریخی فرنیچر کے آرام دہ ہونے کی "جانچ” کرنا اور رہائش گاہ میں نظم و ضبط برقرار رکھنا بھی شامل بتایا جاتا ہے۔

دلچسپ بات یہ ہے کہ لیری دی کیٹ کا سوشل میڈیا پلیٹ فارم ایکس پر بھی ایک مقبول اکاؤنٹ موجود ہے، جسے لاکھوں افراد فالو کرتے ہیں اور جہاں اس سے منسوب مزاحیہ اور سیاسی تبصرے شیئر کیے جاتے ہیں۔