مکہ مکرمہ:سعودی عرب نے حطیم میں عبادت کے لیے خواتین اور مردوں کے مخصوص اوقات مقرر کر دیے

مکہ مکرمہ:(اردودنیا.اِن/ایجنسیز)سعودی عرب نے مسجد الحرام میں خانہ کعبہ سے متصل حطیم (حجرِ اسماعیل) میں نوافل ادا کرنے کے خواہش مند زائرین اور نمازیوں کے لیے مخصوص اوقات مقرر کر دیے ہیں۔

حرمین شریفین کے امور کی جنرل اتھارٹی کے مطابق خواتین کو روزانہ صبح 6 بجے سے 9 بجے تک حطیم میں داخلے کی اجازت ہوگی، جبکہ مرد زائرین رات 10 بجے سے 1 بجے تک اس مقدس مقام میں عبادت کر سکیں گے۔

اتھارٹی کا کہنا ہے کہ اس اقدام کا مقصد مسجد الحرام میں ہجوم کو منظم کرنا، عبادت گزاروں کے لیے سہولت پیدا کرنا اور زائرین کے روحانی تجربے کو مزید بہتر بنانا ہے۔ حطیم کو خانہ کعبہ کی اصل بنیاد کا حصہ سمجھا جاتا ہے اور اسے مسجد الحرام کے انتہائی مقدس مقامات میں شمار کیا جاتا ہے، جہاں نوافل ادا کرنے کی خاص فضیلت بیان کی گئی ہے۔

دوسری جانب، خادمِ حرمین شریفین شاہ سلمان بن عبدالعزیز نے اپنے ذاتی خرچ پر دنیا بھر سے ایک ہزار مرد و خواتین عمرہ زائرین کی میزبانی کی منظوری بھی دے دی ہے۔ یہ اقدام ’’خادمِ حرمین شریفین پروگرام برائے حج، عمرہ و زیارت‘‘ کے تحت کیا جائے گا۔

وزارتِ اسلامی امور، دعوت و ارشاد کے مطابق یہ پروگرام 1448 ہجری کے دوران چار مراحل میں مکمل کیا جائے گا۔ پہلے مرحلے میں ایشیا کے 16 ممالک، جن میں انڈونیشیا، ملائیشیا، فلپائن، تھائی لینڈ، جاپان، چین اور منگولیا شامل ہیں، سے 250 عمرہ زائرین کو مدعو کیا جائے گا۔

ادھر سعودی حکام کے اعداد و شمار کے مطابق 2025 کی چوتھی سہ ماہی میں 1 کروڑ 10 لاکھ سے زائد افراد نے عمرہ ادا کیا، جو مملکت میں مذہبی سیاحت اور عمرہ سفر کی مسلسل بڑھتی ہوئی طلب کو ظاہر کرتا ہے۔

واضح رہے کہ حج کے برعکس عمرہ سال کے کسی بھی وقت ادا کیا جا سکتا ہے، جس کے باعث دنیا بھر سے لاکھوں مسلمان ہر سال مکہ مکرمہ کا رخ کرتے ہیں۔