رام مندر چندہ چوری کیس: فیض آباد بار ایسوسی ایشن کا اعلان، ملزمان کی وکالت پر 5 لاکھ جرمانہ

ایودھیا:(اردودنیا.اِن/ایجنسیز) رام مندر چندہ چوری کیس میں فیض آباد بار ایسوسی ایشن نے اعلان کیا ہے کہ ایسوسی ایشن کا کوئی بھی وکیل ملزمان کی جانب سے مقدمہ نہیں لڑے گا۔ بار ایسوسی ایشن کے صدر کالیکا مشرا نے کہا کہ اگر کوئی وکیل ملزمان کی پیروی کرتا ہے تو اسے 5 لاکھ روپے جرمانہ ادا کرنا ہوگا۔

کالیکا مشرا نے کہا کہ عوام موجودہ تحقیقات سے مطمئن نہیں ہیں، اس لیے معاملے کی جانچ مرکزی تفتیشی ادارے (سی بی آئی) کے سپرد کی جانی چاہیے تاکہ اصل ملزمان سامنے آ سکیں۔

انہوں نے بتایا کہ اس معاملے کی پیروی کے لیے وکلا کی ایک خصوصی کمیٹی تشکیل دی گئی ہے، جو چمپت رائے، گوپال راؤ اور انیل مشرا کے خلاف قانونی کارروائی کرے گی اگر ان کے خلاف شواہد سامنے آتے ہیں۔

بار ایسوسی ایشن کے صدر کا کہنا تھا کہ اس واقعے کے بعد لوگوں میں یہ خدشہ پیدا ہوگیا ہے کہ مندر میں دیا جانے والا چندہ غلط استعمال ہو سکتا ہے، جس کی وجہ سے عوام چندہ دینے سے ہچکچا رہے ہیں۔ انہوں نے رام جنم بھومی ٹرسٹ میں بیرونی ارکان کو شامل کرنے کا بھی مطالبہ کیا تاکہ شفافیت برقرار رہے اور حقیقت عوام کے سامنے آسکے۔