مہاراشٹر: ساس نے بہو کو صبح جگایا، غصے میں لاٹھی سے حملہ، مقدمہ درج
صبح سویرے کھیتوں کے کام کے لیے جگانے پر بہو برہم، 71 سالہ ساس پر مبینہ لاٹھی سے حملہ،
رتناگیری:(اردودنیا.اِن/ایجنسیز) مہاراشٹر کے رتناگیری ضلع میں ساس اور بہو کے درمیان گھریلو تنازع اس وقت سنگین رخ اختیار کر گیا جب 71 سالہ ساس نے اپنی بہو کو صبح سویرے کھیتوں میں کام کے لیے جگایا۔ الزام ہے کہ بہو نیند میں خلل پڑنے پر اس قدر برہم ہوگئی کہ اس نے پہلے ساس کے ساتھ بدزبانی کی اور پھر لکڑی کے ڈنڈے سے حملہ کر دیا، جس سے بزرگ خاتون زخمی ہوگئیں۔
یہ واقعہ رتناگیری ضلع کے چپلون تعلقہ کے ریہل-گانواڑی گاؤں میں پیش آیا۔ متاثرہ خاتون سوورنا کرشنا ناچارے نے چپلون پولیس اسٹیشن میں درج کرائی گئی شکایت میں بتایا کہ دھان کی فصل کے موسم کے باعث انہیں صبح سویرے کھیتوں میں کام کے لیے جانا تھا، اس لیے انہوں نے اپنی بہو کو بھی جلدی اٹھنے کے لیے کہا۔
شکایت کے مطابق، بہو اس بات پر شدید ناراض ہوگئی اور دونوں کے درمیان تلخ کلامی شروع ہوگئی۔ الزام ہے کہ میوری درشن ناچارے نے پہلے ساس کے ساتھ بدزبانی کی، پھر چولہے کے قریب رکھا ہوا لکڑی کا ڈنڈا اٹھا کر ان پر حملہ کر دیا۔ اس حملے میں 71 سالہ خاتون زخمی ہوگئیں۔
واقعے کے بعد ساس نے پولیس سے رجوع کیا۔ ان کی شکایت کی بنیاد پر چپلون پولیس نے بہو کے خلاف مقدمہ درج کر لیا ہے۔
پولیس کا کہنا ہے کہ واقعے کی تمام پہلوؤں سے تحقیقات کی جا رہی ہیں اور شواہد کی بنیاد پر آئندہ قانونی کارروائی عمل میں لائی جائے گی۔
