ایران کے حملے میں ہلاک ہونے والی امریکی فوجی سارجنٹ اینجل رام پرساد کون تھیں؟
ایران کے حملے میں امریکی فوج کی ایک اور جانی قربانی
نیویارک، 24 جولائی (اردو دنیا نیوز/ایجنسیاں)اردن میں واقع ایئر بیس پر ایرانی حملے میں ہلاک ہونے والی امریکی فوجی سارجنٹ اینجل سارہ رام پرساد کی شناخت سامنے آنے کے بعد امریکہ میں غم کی لہر دوڑ گئی ہے۔ امریکی محکمہ دفاع کے مطابق 28 سالہ اینجل رام پرساد ان تین امریکی فوجیوں میں شامل تھیں جو 17 جولائی کو ہونے والے حملے میں جان کی بازی ہار گئے۔
حملے کے فوراً بعد انہیں لاپتہ قرار دیا گیا تھا، تاہم بعد ازاں امریکی فوج نے تصدیق کی کہ وہ دشمن کے حملے میں ہلاک ہو چکی ہیں۔ اس وقت وہ داعش کے خلاف جاری امریکی قیادت والے فوجی مشن آپریشن انہیرنٹ ریزولو (Operation Inherent Resolve) کے تحت تعینات تھیں۔
اینجل رام پرساد کی پیدائش ٹرینیڈاڈ اینڈ ٹوباگو میں ہوئی تھی۔ صرف دو برس کی عمر میں وہ اپنی والدہ اور بہن کے ساتھ امریکہ منتقل ہوئیں، جہاں ان کی پرورش نیویارک کے علاقے اوزون پارک، کوئنز میں ہوئی۔
انہوں نے ابتدائی تعلیم پی ایس 108 سے حاصل کی، بعد ازاں فاریسٹ ہلز ہائی اسکول سے گریجویشن کیا اور جان جے کالج سے کریمنل جسٹس میں ڈگری حاصل کی۔ اہل خانہ کے مطابق وہ کم عمری سے فوج میں شامل ہونا چاہتی تھیں، لیکن پہلے تعلیم مکمل کرنے کا فیصلہ کیا۔
مارچ 2019 میں 21 سال کی عمر میں اینجل رام پرساد نے امریکی فوج میں شمولیت اختیار کی۔ وہ 25U سگنل آپریشنز سپورٹ اسپیشلسٹ کے طور پر خدمات انجام دے رہی تھیں اور جرمنی کے شہر انسباخ میں قائم 1st Battalion, 57th Air Defense Artillery Regiment کے ساتھ تعینات تھیں۔
اپنی مختصر مگر نمایاں فوجی خدمات کے دوران اینجل رام پرساد کو کئی اعزازات سے نوازا گیا، جن میں آرمی کمنڈیشن میڈل، آرمی اچیومنٹ میڈل، آرمی گڈ کنڈکٹ میڈل، نیشنل ڈیفنس سروس میڈل اور آرمی سروس ربن شامل ہیں۔
اہل خانہ نے ایک بیان میں کہا کہ اینجل رام پرساد ہمیشہ دوسروں کی مدد کے لیے آگے بڑھتی تھیں اور کمزور لوگوں کا دفاع کرنا ان کی شخصیت کا نمایاں وصف تھا۔
ان کی والدہ کیرول ایسیویڈو نے میڈیا سے گفتگو کرتے ہوئے کہا: "میری بیٹی ایک بہترین سپاہی تھی۔ اس نے اس ملک کی خدمت کی اور اسی ملک کے لیے اپنی جان قربان کی۔ مجھے اس پر بے حد فخر ہے۔”ان کی خالہ جوڈی ریکال نے بھی انہیں نہایت پرسکون، ذمہ دار اور مشکل حالات میں خاندان کا سہارا قرار دیا۔
اینجل رام پرساد کی شہادت کے بعد نیویارک کے علاقے اوزون پارک میں مقامی افراد نے امریکی پرچم آویزاں کیے، گھروں کی روشنیاں ان کی میت کی واپسی تک جلائے رکھیں اور ان کے گھر کے باہر پھول اور تعزیتی پیغامات رکھ کر انہیں خراجِ عقیدت پیش کیا۔
امریکی حکام کے مطابق ایران کے ساتھ جاری حالیہ کشیدگی کے دوران ہلاک ہونے والے امریکی فوجیوں کی تعداد بڑھ کر 18 ہو چکی ہے، جبکہ مشرقِ وسطیٰ میں سیکیورٹی صورتحال بدستور کشیدہ ہے۔
"My daughter was a good soldier,” the mother of fallen U.S. Army Sgt. Angel Rampersad said Thursday. Rampersad was among three soldiers killed in an Iranian attack on a U.S. base in the Middle East last week.
"She fought for this country, and she died for this country. And I am… pic.twitter.com/Uf2dEgF4BQ
— CBS News (@CBSNews) July 23, 2026
