میٹا پر 567 ملین ڈالر کا جرمانہ، نوجوانوں کے تحفظ میں ناکامی پر امریکی عدالت کا فیصلہ

نیویارک، 7 اگست (اردودنیانیوز/ایجنسیاں) امریکی ٹیکنالوجی کمپنی میٹا کو اس وقت بڑا قانونی دھچکا لگا جب امریکی ریاست نیو میکسیکو کی ایک عدالت نے کمپنی پر 567 ملین ڈالر (تقریباً ₹4,933 کروڑ بھارتی روپے) کا جرمانہ عائد کرنے کا حکم سنایا۔ عدالت نے قرار دیا کہ فیس بک اور انسٹاگرام جیسے پلیٹ فارمز پر نوجوانوں کے تحفظ سے متعلق مناسب اقدامات نہ ہونے کی وجہ سے یہ رقم بطور جرمانہ وصول کی جائے گی۔ عدالتی فیصلے کے مطابق جرمانے کی بڑی رقم نوجوانوں کی ذہنی صحت، علاج اور بحالی کے منصوبوں پر خرچ کی جائے گی تاکہ سوشل میڈیا سے متاثر ہونے والے کم عمر افراد کو بہتر سہولتیں فراہم کی جا سکیں۔

عدالت کے حکم کے مطابق 420 ملین ڈالر نوجوانوں کے علاج، ذہنی صحت کی خدمات اور دیگر فلاحی پروگراموں کے لیے مختص کیے جائیں گے، جبکہ باقی رقم آئندہ پانچ برس کے دوران آگاہی مہم، اسکریننگ سروسز اور بچوں کے تحفظ سے متعلق منصوبوں پر خرچ ہوگی۔ عدالت کا کہنا ہے کہ اس فیصلے کا مقصد صرف جرمانہ وصول کرنا نہیں بلکہ نوجوانوں کے لیے محفوظ آن لائن ماحول کو یقینی بنانا بھی ہے۔

عدالتی کارروائی کے دوران میٹا پر یہ الزام بھی زیر بحث آیا کہ کمپنی نے بچوں اور نوعمر صارفین کی ذہنی صحت پر پڑنے والے ممکنہ منفی اثرات کو سنجیدگی سے نہیں لیا اور بعض حساس معاملات، جن میں بچوں کے جنسی استحصال سے متعلق مواد کی نگرانی بھی شامل ہے، ان پر مؤثر اقدامات کرنے میں ناکام رہی۔ عدالت نے اسی بنیاد پر کمپنی کے خلاف سخت مؤقف اختیار کیا۔

فیصلے کے دوسرے مرحلے میں عدالت نے میٹا کو متعدد حفاظتی اصلاحات نافذ کرنے کی ہدایت بھی دی ہے، جن میں کم عمر صارفین کی عمر کی تصدیق، پرائیویسی سیٹنگز کو مزید مضبوط بنانا، نشہ آور طرز کے استعمال کو محدود کرنے والے فیچرز اور بچوں کے استحصال سے متعلق مواد کی نگرانی کو مؤثر بنانا شامل ہے۔

دوسری جانب میٹا نے عدالت میں مؤقف اختیار کیا کہ 13 سال سے کم عمر بچوں کے لیے لازمی عمر کی تصدیق نافذ کرنا امریکی قانون COPPA کے بعض تقاضوں سے متصادم ہو سکتا ہے، کیونکہ اس کے لیے کم عمر صارفین کی ذاتی معلومات اکٹھی کرنا ضروری ہوگا۔ کمپنی نے اسی بنیاد پر بعض مجوزہ اقدامات پر اعتراض کیا، تاہم عدالت نے نوجوانوں کے تحفظ کو اولین ترجیح قرار دیتے ہوئے سخت ہدایات جاری کر دیں۔