کرناٹک:بھکاری خاتون کی موت کے بعد گھر سے نوٹوں سے بھری 30 سے زائد بوریاں برآمد
بھیک مانگ کر زندگی گزارنے والی 68 سالہ حور النساء کے گھر سے 10، 20 اور 50 روپے کے ہزاروں نوٹ ملے،
منڈیا، کرناٹک، 24 اگست (اردودنیانیوز/ایجنسیز)کرناٹک کے منڈیا ضلع میں ایک بزرگ خاتون کی موت کے بعد اس کے گھر سے نقد رقم کا ایسا ذخیرہ ملا کہ مقامی لوگ حیران رہ گئے۔ خاتون اپنی زندگی کا بیشتر حصہ بھیک مانگ کر گزارتی رہی، لیکن انتقال کے بعد اس کے گھر میں 30 سے زائد پلاسٹک کی بوریاں ملیں جن میں 10، 20 اور 50 روپے کے نوٹ بڑی تعداد میں بھرے ہوئے تھے۔ رقم کی گنتی شروع ہوئی تو کئی لاکھ روپے سامنے آچکے تھے، جبکہ مزید بوریوں میں موجود رقم کی گنتی باقی تھی۔
یہ معاملہ منڈیا ضلع کے گوتھالو علاقے کا ہے، جہاں 68 سالہ حور النساء بھیک مانگ کر اپنا گزر بسر کرتی تھیں۔ حور النساء اپنی بہن کے ساتھ ایک کرائے کے مکان میں رہتی تھیں۔ دونوں بہنوں نے شادی نہیں کی تھی۔ تقریباً دو سال قبل بہن کے انتقال کے بعد حور النساء اسی گھر میں تنہا زندگی گزار رہی تھیں۔
عمر سے متعلق بیماری کے باعث حور النساء کا گزشتہ روز انتقال ہوگیا۔ ان کی موت کے بعد مقامی افراد نے گھر کا جائزہ لیا تو انہیں مختلف جگہوں پر رکھی ہوئی 30 سے زائد پلاسٹک کی بوریاں نظر آئیں۔ جب بوریاں کھولی گئیں تو ان کے اندر 10، 20 اور 50 روپے کے ہزاروں نوٹ موجود تھے۔ نقد رقم کی بڑی مقدار دیکھ کر مقامی افراد بھی حیران رہ گئے۔
مقامی لوگوں نے رقم کو باہر نکال کر گننا شروع کیا۔ کئی گھنٹوں تک جاری رہنے والی گنتی میں تقریباً 8 سے 9 لاکھ روپے کی رقم سامنے آچکی تھی۔، تاہم گھر میں موجود مزید تقریباً 20 بوریوں میں رکھی رقم کی گنتی باقی تھی۔ اسی وجہ سے گھر سے ملنے والی مجموعی رقم کا حتمی اندازہ فی الحال سامنے نہیں آیا ہے۔
گھر سے ملنے والی نقد رقم فی الحال گوتھالو علاقے کی ایک مسجد کی نگرانی میں رکھی گئی ہے۔ مقامی کمیونٹی کے ذمہ دار افراد نے حور النساء کے رشتہ داروں کو رقم ملنے کی اطلاع دے دی ہے۔ رشتہ داروں کی آمد کے بعد باقی بوریوں میں موجود رقم گننے کا عمل مکمل کیا جائے گا۔
رقم کی مکمل گنتی کے بعد یہ فیصلہ کیا جائے گا کہ اسے قانونی طور پر کس کے حوالے کیا جائے۔ واقعے نے مقامی لوگوں کو بھی حیران کردیا ہے کہ معمولی مالیت کے نوٹوں کی شکل میں اتنی بڑی رقم ایک ایسی خاتون نے برسوں میں جمع کی، جس نے اپنی پوری زندگی بھیک مانگ کر گزاری تھی۔
حور النساء کے گھر سے ملنے والی رقم کی خبر سامنے آنے کے بعد علاقے میں یہ واقعہ لوگوں کی توجہ کا مرکز بن گیا ہے۔ خاتون کی زندگی انتہائی سادہ تھی، لیکن ان کے انتقال کے بعد گھر سے ملنے والی نقد رقم نے ان کی زندگی کے ایک ایسے پہلو کو سامنے لا دیا جس سے آس پاس کے لوگ بھی لاعلم تھے۔
