نئی دہلی:(اردودنیا.اِن)کوروناکے نام پرراجدھانی جیسی ٹرینوں میں کھانا بند کیا گیا لیکن کرائے میں کوئی کمی نہیں ہوئی۔اب وزارت شہری ہوا بازی کی وزارت نے کہا ہے کہ اس ایئر لائن کو پرواز کے دوران کھانا فراہم کرنے کی اجازت نہیں ہوگی جس کے سفر کی مدت دوگھنٹے سے بھی کم ہے کیونکہ ملک میں کورونا وائرس کے واقعات میں مسلسل اضافہ ہوتا جارہا ہے۔ وزارت نے اپنے حکم میں کہاہے کہ یہ پابندی جمعرات سے نافذ العمل ہوگی۔
جب گذشتہ سال کورونا وائرس لاک ڈاؤن کے بعد 25 مئی سے گھریلوپرواز کی خدمات کا آغاز کیا گیا تھا تب ایئر لائنز کو کچھ شرائط میں طیارے کے اندر کھانا مہیا کرنے کی اجازت دی تھی۔پہلے کے حکم پر نظر ثانی کرتے ہوئے ، وزارت کی نئی ہدایات میں کہاگیاہے کہ گھریلو علاقوں میں ہوائی جہاز چلانے والی ایئر لائن کمپنیاں ایک پرواز کے دوران کھانا مہیا کرسکتی ہیں جہاں طیارہ دو گھنٹے یا اس سے زیادہ سفر کرتاہے۔وزارت نے کہاہے کہ کوویڈ۔19 اور اس کی مختلف حالتوں کے بڑھتے ہوئے خطرے کو دیکھتے ہوئے ، اس نے گھریلو پروازوں میں سفرکے دوران کھانا فراہم کرنے کی سہولت کا جائزہ لینے کا فیصلہ کیا ہے۔
