ممبئی : 8 جنوری (ایجنسی)متنازعہ بیانات کے ذریعے سرخیوں میں رہنے والی فلمی اداکارہ کنگنا رناوت اور انکی بہن رنگولی کو غداری اور دیگر دوسرے الزامات کے تحت درج ایف ائی آر کے کیس میں اپنے بیانات قلمبند کرنے کے لئے آج باندرہ پولیس اسٹیشن پہنچی۔اس سے قبل وہ قانون کا سہارا لیکر پولیس اسٹیشن آنے سے بچتی رہی تھیں۔
واضح رہے کہ ممبئی پولیس نے گذشتہ سال اکتوبر میں واٹس ایپ پر کنگنا کو نوٹس بھیجا تھا۔ اس وقت وہ ہماچل پردیش میں اپنے آبائی شہر سے تھیں۔ باندرا پولیس نے کنگنا رناوت اور اس کی بہن رنگولی کو بھی نوٹس بھیجا گیا تھا۔ اور متعدد بار دونوں کو پوچھ گچھ کے لئے بلایا تھا ، تاہم وہ حاضر نہیں ہوئیں تھیں۔
عدالت نے ایک درخواست پرسماعت کے دوران حکم دیا تھا کہ کنگنا کے خلاف مقدمہ دائر کیا جائے۔جس کے مطابق گذشتہ سال 17 اکتوبر کو کنگنا کے خلاف مقدمہ درج کیا گیا تھا۔
ممبئی پولیس نے اس معاملہ کی تحقیقات کے لئے انہیں نوٹس جاری کیا تھا۔باندرا کی عدالت نے سوشانت سنگھ راجپوت کے خودکشی کیس میں مذہبی منافرت پھیلانے کی کوشش کرنے کے الزام میں کنگنا رناوت کے خلاف ایف آئی آر درج کرنے کا ممبئی پولیس کو حکم دیا تھا۔ جس کے بعد کنگنا اور ان کی بہن رنگولی چاندیل کے خلاف باندرا پولیس اسٹیشن میں دفعہ 295 (اے) ، 153 (اے) اور 124 (اے) کے تحت مقدمہ درج کیا گیا ہے۔
باندرہ عدالت نے کاسٹنگ ڈائریکٹر ساحل اشرف سید کی شکایت کے بعد کنگنا اور اس کی بہن کے خلاف ایف آئی آر درج کرنے کی ہدایت کی تھی۔ جس میں سید اشرف نے کہا تھا کہ کنگنا کے ٹویٹس اور بیانات کے بعد بالی ووڈ میں کافی فرقہ وارانہ منافرت پائی جاتی ہے، اور وہ اس کے بعد کام حاصل کرنے سے قاصر ہیں۔
پولیس نے مجسٹریٹس کے عدالتی حکم کے بعد ایف آئی آر درج کی تھی ، تاہم ، بار بار سمن جاری کرنے کے بعد بھی رناوت بہنیں پولیس کے سامنے پیش نہیں ہوئیں۔ کنگنا نے بعد میں بمبئی ہائیکورٹ سے رجوع کیا تھا۔ اس کے بعد بمبئی ہائیکورٹ نے کنگنا اور رنگولی کو باندرہ پولیس اسٹیشن میں پولیس کے سامنے پیش ہونے کو کہا تھا۔
ذرایع کے مطابق ،آج تھانہ باندرا کے عہدیداروں نے اس معاملے میں سوالات کی فہرست تیار کی ہے۔ اس کے تمام ٹویٹس اور ویڈیو بیانات نوٹ کردیئے گئے ہیں ، اور ان امور پر اس سے سوالات پوچھے جائیں گے۔ پولیس اسٹیشن میں حاضری کے وقت ان کے ساتھ ایڈوکیٹ رضوان صدیق بھی موجود تھے۔
