پارلیمنٹ میں تعطل ختم کرنے کیلئے وزیر اعظم مداخلت کریں مانسون سیشن میں توسیع کی جائے: آر جے ڈی رکن پارلیمنٹ منوج جھا

نئی دہلی،8اگست:(اردودنیا.اِن/ایجنسیاں)راشٹریہ جنتا دل (آر جے ڈی) کے لیڈر منوج کمار جھا نے اتوار کو کہا کہ حکومت پارلیمنٹ میں #پیگاسس تنازعہ پر مذاکرات کو روک رہی ہے اور وزیراعظم نریندر #مودی کو اس مسئلے کو حل کرنے کیلئے مداخلت کرنا چاہیے۔ انہوں نے کہا کہ مانسون سیشن کو بڑھایا جائے تاکہ #پارلیمنٹ کے ضائع ہونے والے وقت کی تلافی کی جاسکے۔

#راجیہ سبھا کے ایک رکن جھا نے حکومت پر بار بار زوردیا کہ اپوزیشن جماعتوں کے ساتھ بات چیت قائم کرنے کی کوشش کی جا رہی ہے۔ انہوں نے کہا کہ اس کا یہ مطلب نہیں ہے کہ آپ نے ’آپ جیب میں ہاتھ ڈال کر، چہرے پر سخت نظر ڈال کرکہے کہ ہمارے پاس دینے کے لیے بس یہی ہے، مزید کچھ نہیں‘۔ ایک انٹرویو میں جھا نے کہاکہ بات چیت کو فروغ دینے کی آڑ میں وہ (حکومت) مذاکرات کے دروازے بند کر رہے ہیں، میں کئی بار کہہ چکا ہوں کہ جن نام نہاد لوگوں کو ڈائیلاگ کرنے کی ذمہ داری دی گئی ہے، ان کے پاس شاید کوئی ٹھوس پیشکش کرنے کا اختیار نہیں ہے۔

قابل ذکر ہے کہ جب سے 19 جولائی کو پارلیمنٹ کا مانسون سیشن شروع ہوا ہے، اپوزیشن جماعتوں کے احتجاج اور تعطل کی وجہ سے ایوان کی کارروائی متاثر ہوئی ہے۔ اپوزیشن پیگاسس جاسوسی تنازعہ پر بحث کے مطالبے پر قائم ہے۔میڈیا تنظیموں کے ایک بین الاقوامی گروپ نے کہا تھا کہ پیگاسس #اسپائی ویئر کے ذریعے ہندوستان میں 300 سے زیادہ موبائل نمبروں کی نگرانی کی جا رہی ہے۔

اس میں کانگریس لیڈر راہل #گاندھی، دو وزراء پرہلاد سنگھ پٹیل اور اشونی وشنو، تاجر انیل امبانی، 40 سے زائد صحافی، تین اپوزیشن لیڈروں کے علاوہ کئی کارکنان بھی تھے۔ حکومت اس معاملے میں اپوزیشن کے تمام الزامات کو مسترد کرتی رہی ہے۔

پیگاسس کے معاملے پر اپوزیشن کے مباحثے کے مطالبے اور اس پر پارلیمنٹ میں تعطل کے بارے میں پوچھے جانے پر جھا نے کہا کہ حکومت میڈیا میں کہتی ہے کہ وہ بات چیت قائم کرنے کی کوشش کر رہی ہے لیکن اس طرح کی کوششوں کا مطلب صرف سننا نہیں بلکہ سمجھنا ہے۔آر جے ڈی کے سینئر لیڈر نے الزام لگایا کہ حکومت بدنیتی پر مبنی زبان استعمال کر رہی ہے جس سے تعطل ختم ہونے کے امکانات ختم ہو گئے ہیں۔