محدود وسائل کے باوجود بھارت کوروناسے بہترطور پر نمٹنے میں کامیاب: امت شاہ

نئی دہلی28ستمبر:(اردودنیا.اِن/ایجنسیاں)مرکزی وزیر داخلہ امت شاہ نے منگل کو کہا کہ بھارت نے محدود وسائل کے باوجود دنیا کے دیگر ممالک کے مقابلے میں کوویڈ 19 سے بہتر نمٹا۔یہاں نیشنل ڈیزاسٹر مینجمنٹ اتھارٹی (این ڈی ایم اے) کے 17 ویں یوم تاسیس سے خطاب کرتے ہوئے شاہ نے کہا کہ مرکز ملک بھر کے 350 اضلاع میں آپا مترا منصوبہ شروع کرنے کا منصوبہ بنا رہا ہے۔ اس کے تحت عام شہریوں کو تربیت دی جائے گی ، تاکہ وہ کسی بھی آفت کی صورت میں فوری کارروائی کر سکیں۔

Join Urdu Duniya WhatsApp Group.

انہوں نے کہاہے کہ محدود وسائل اور 130 کروڑ کی بڑی آبادی کے باوجود ہندوستان نے کوویڈ 19 سے تمام دیگر ممالک سے بہتر نمٹا ہے۔وزیر داخلہ نے کہا کہ اگر کوئی غیر جانبدار ایجنسی تجزیہ کرتی ہے تو یہ اس نتیجے پر پہنچے گی کہ ملک نے عالمی وبائی مرض سے نمٹنے اور شرح اموات کو کافی حد تک کم کرنے میں بہت اچھا کام کیا ہے۔

انہوں نے کہاہے کہ بہت سے ممالک کے وبا سے نمٹنے میں پسینے چھوٹ گئے ہیں۔امت شاہ نے عالمی وبا کے دوران قابل تعریف کام کرنے پر این ڈی ایم اے کی تعریف کی۔عالمی وبائی امراض کے دوران ملک کے کچھ حصوں پر آنے والے طوفان کا حوالہ دیتے ہوئے انہوں نے کہا کہ بہترین منصوبہ بندی اور تیاری کے باعث ایک بھی آکسیجن پلانٹ کو نقصان نہیں پہنچا اور آکسیجن پلانٹس اور طوفان سے متاثرہ علاقوں میں اسپتالوں کو بجلی کی فراہمی متاثر نہیں ہوئی۔امت شاہ نے کہاہے کہ ہم نے وزیر اعظم نریندر مودی کی قیادت میں بہترین تیاری کی ہے۔

انہوں نے اسکیم کے بارے میں بتایاہے کہ اس اسکیم کا پائلٹ عمل درآمد ملک کی 25 ریاستوں کے 30 اضلاع میں کامیاب رہا ہے۔ انہوں نے کہاہے کہ اس سکیم کے تحت لوگوں کو تربیت دی جائے گی کہ کسی بھی آفت کی صورت میں فوری طور پر کیسے کام کیا جائے ، مصیبت میں لوگوں کی مددکیسے کی جائے اور انہیں کیسے بچایا جائے۔امت شاہ نے بتایاہے کہ اس منصوبے میں شامل لوگوں کو انشورنس فراہم کیا جائے گا اور اس سلسلے میں 28 ریاستوں کے ساتھ معاہدے کیے جا رہے ہیں۔

انہوں نے کہا کہ حکومت کا وژن یہ ہے کہ کسی بھی آفت کے دوران کوئی جانی نقصان نہ ہو اور یہ بڑی حد تک کامیاب رہی ہے۔انہوں نے کہاہے کہ بڑی تعدادمیں جانیں بچائی جا سکتی ہیں اگر آسمانی بجلی جیسی آفات کے لیے ابتدائی انتباہی نظام نافذ کیا جائے۔