پانی پت؍کیتھل،4فروری:(اردودنیا.اِن/ایجنسیاں) پانی پت کے جی ٹی روڈ پر واقع پولیس لائن کے قریب جمعہ کی صبح پانچ بجے ایک بڑا حادثہ آگیا۔ اوورٹیک کرنے والے ٹرک نے ایکو کار کو ٹھوکر مار دی، حادثے میں ایکو گاڑی میں سوار ایک ہی خاندان کے چار افراد ہلاک ،جبکہ تین دیگر زخمی ہوگئے۔
مہلوکین میں دو حقیقی بھائی، ایک بچہ اور چچا شامل ہیں۔ سب یوپی سے ہریانہ کے کیتھل جا رہے تھے۔ اطلاع ملتے ہی سیکٹر 29 تھانہ پولیس موقع پر پہنچ کر کارروائی میں مصروف ہوگئی ۔
یوپی کے بلند شہر کے رہنے والے دیانند نے بتایا کہ وہ حال ہی میں نوئیڈا منتقل ہوئے ہیں۔انہوں نے بتایا کہ بیٹی وملا کی شادی کیتھل میں ہوئی تھی، انہیں جمعرات کی رات تقریباً 11 بجے اس کی موت کی اطلاع ملی۔
وہ اپنے بیٹوں رمیش (28)نواب (40)، راکیش، ممتا، نیلم، پریانشو (6) اور ونشیکا کے ساتھ کرائے کی ای سی سی او کار میں دوپہر 2 بجے کیتھل کے لیے روانہ ہوئے، جب وہ صبح 5 بجے جی ٹی روڈ پانی پت پر پولیس لائن کے قریب پہنچے ،تو پیچھے سے اوور ٹیک کرنے والے ٹرک ڈرائیور نے ٹھوکر مار دی۔
تصادم اتنا شدید تھا کہ ٹرک ایکو کارکو تقریباً 40 میٹر تک گھسیٹتا چلا گیا۔ تصادم سے گاڑی میں چیخ و پکار مچ گئی۔دیانند نے بتایا کہ اس کے بڑے بیٹے نواب (40) اور رمیش (28)، بھائی راکیش (35) اور چھ سالہ پریانشو اس حادثے میں ہلاک ہوگئے۔ حادثے میں ڈرائیور اور ممتا (35) نیلم (32) اور ونشیکا (1) جو اس کے ساتھ بیٹھی تھیں، بال بال بچ گئے۔
لواحقین نے الزام لگایا کہ ملزم ٹرک ڈرائیور اسے ٹکر مار کر موقع سے فرار ہو گیاہے، ملزم ڈرائیور نشے کی حالت میں تھا۔ ٹرک میں شراب کی بوتل پڑی ہوئی ملی ہے۔
تین مہلوک کا پوسٹ مارٹم پانی پت میں اور ایک کا روہتک پی جی آئی میں کیا جائے گا۔ حادثہ میں تین کی موقع پر ہی موت ہو گئی، جبکہ نواب شدید زخمی ہوگیا۔ ایمبولینس کے ذریعہ اسے پہلے ایک پرائیویٹ اسپتال لے جایا گیا، علاج کے لیے پیسے کم ہونے پر نجی اسپتال نے اسے جنرل اسپتال ریفر کیا، حالت نازک دیکھ کر اسے یہاں سے بھی پی جی آئی ریفر کیا، لیکن نواب راستے میں ہی دم توڑ گیا۔
