بی جے پی سرکاروں میں پیپرزلیک کیوں ہورہے ہیں؟
جے پور15فروری:(اردودنیا.اِن/ایجنسیاں)راجستھان کے وزیراعلیٰ اشوک گہلوت نے منگل کو ملک میں بے روزگاری کو لے کر مرکزمیں حکمراں بی جے پی زیرقیادت نیشنل ڈیموکریٹک الائنس (این ڈی اے) کو نشانہ بنایاہے۔ انہوں نے الزام لگایاہے کہ این ڈی اے اور بھارتیہ جنتا پارٹی (بی جے پی)نے ملک کو برباد کر دیا ہے۔اس بات کو دوہراتے ہوئے کہ آئین اور جمہوریت خطرے میں ہے، اشوک گہلوت نے کہاہے کہ آج پورا ملک اس سے پریشان ہے۔ایک طرح سے اجستھان ٹیچر اہلیت ٹیسٹ (REET)-2021 کے پیپر لیک معاملے کی سنٹرل بیورو آف انویسٹی گیشن (سی بی آئی) کی انکوائری کے مطالبے کو مستردکرتے ہوئے انہوں نے کہاہے کہ بی جے پی یہ مطالبہ ریاستی حکومت کو غلط طریقے سے بدنام کرنے کے لیے کر رہی ہے۔۔اشوک گہلوت ریاستی اسمبلی میں گورنر کلراج مشرا کے خطاب پر شکریہ کی تحریک پر بحث کا جواب دے رہے تھے۔ اہم اپوزیشن بی جے پی نے بحث میں حصہ نہیں لیاہے۔ وزیر اعلیٰ کے جواب کے بعد ایوان نے شکریہ کی تحریک صوتی ووٹ سے منظور کر لی۔گجرات، ہریانہ، مدھیہ پردیش، اتر پردیش اور مرکزی حکومت کے مختلف امتحانات کے پیپر لیک ہونے کے واقعات کا حوالہ دیتے ہوئے اشوک گہلوت نے پوچھا ہے کہ پورے ملک میں پیپر کیوں لیک ہو رہے ہیں۔ انہوں نے کہا کہ اس بات کی تہہ تک پہنچنا چاہیے کہ پیپرز کیوں لیک ہو رہے ہیں،گینگ کیوں بن رہے ہیں،یہ حالات کیوں پیدا ہو رہے ہیں۔ کچھ وجوہات ہوں گی۔ نوجوانوں میں مایوسی پھیلے گی۔ملک میں جو ماحول بنتا ہے عوام بھی ایسا سلوک کرنے لگتی ہے۔ ماحول بنانے کا ذمہ دار کون ہے، این ڈی اے حکومت اوربی جے پی نے ملک کو برباد کر دیا ہے، پورا ملک پریشان ہے۔ملک میں بے روزگاری کا ذکر کرتے ہوئے، انہوں نے کہاہے کہ ملک میں بے روزگاری دھماکہ خیز حالت میں ہے۔بہار میں ٹرینیں جل رہی ہیں۔ برسوں بعد پہلی بار دیکھا ہے کہ ٹرین جل رہی ہے اور اگر اس پر بروقت قابو نہ پایا گیا تو پتہ نہیں نوجوان کس سمت چلے جائیں گے۔ جب ملک میں حالات ایسے ہوں، حکومت کسی بھی جماعت کی ہو، ان کی ترجیح یہ ہے کہ اپنے نوجوانوں کے مسائل کیسے حل کریں۔وزیراعلیٰ نے کہا کہ میں نے ملک میں ایسی صورتحال کبھی نہیں دیکھی، آج آئین اور جمہوریت خطرے میں ہے۔ ملک میں ایسا ہی ماحول ہے۔ اس کے فوائد اور نقصانات دونوں پر غور کرنا چاہئے۔ کوئی نہیں جانتا کہ یہ ملک کس طرف جا رہا ہے۔ ملک میں بداعتمادی، بدامنی، تشدد اور کشیدگی کی فضا ہے۔ پوراملک پریشان ہے۔اشوک گہلوت نے کہاہے کہ ان کی حکومت نے اپنی تین سالہ میعاد مکمل کر لی ہے اور اب بھی کہیں بھی حکومت مخالف لہر نہیں ہے۔ اس سے پریشان ہو کر بی جے پی ہائی کمان کے کہنے پر حکومت کو جھوٹے طریقے سے بدنام کرنے کے لیے نان ایشوز کو ایشو بنانے کی کوشش کی جا رہی ہے۔
