ممبئی،29؍مارچ :(اردودنیا.اِن/ایجنسیاں) نواب ملک کی مشکلات میں مزید اضافہ ہو سکتا ہے۔ ای ڈی نے نواب ملک اور خاندان کے دیگر افراد کے اثاثوں کی معلومات جمع کرنا شروع کر دی ہے۔ ای ڈی نے جوائنٹ ڈسٹرکٹ رجسٹرار کو خط لکھ کر جائیدادوں کی تفصیلات طلب کی ہیں۔
ملک اور ان کے ارکان خاندان کے نام کرلا اور باندرہ میں مختلف جائیدادوں کی تفصیلات کے ساتھ دستاویزات فراہم کرنے کا مطالبہ کیا۔ ای ڈی نے منی لانڈرنگ کیس میں 23 فروری کو نواب ملک کو گرفتار کیا تھا۔ نواب ملک اس وقت آرتھر روڈ جیل میں عدالتی حراست میں ہیں۔واضح رہے کہ منی لانڈرنگ کے الزام میں گرفتار مہاراشٹر حکومت کے وزیر نواب ملک کی جیل تحویل میں 4 اپریل تک توسیع کر دی گئی ہے۔
ملک کی درخواست پر عدالت نے انہیں جیل میں ایک بستر اور کرسی کی اجازت دی تھی۔ واضح رہے کہ نواب کو انفورسمنٹ ڈائریکٹوریٹ (ای ڈی) نے گزشتہ ماہ گرفتار کیا تھا اور انہیں انفورسمنٹ ڈائریکٹوریٹ کے ریمانڈ پر بھیج دیا گیا تھا۔ مرکزی تفتیشی ایجنسی کے اہلکار گزشتہ ماہ این سی پی لیڈر ملک کے گھر پہنچے، جہاں ان سے ایک گھنٹے تک پوچھ گچھ کی گئی۔
اس کے بعد انہیں ای ڈی کے دفتر لایا گیا اور طویل پوچھ گچھ کی گئی۔ ملک کو پوچھ گچھ کے بعد گرفتار کر لیا گیا۔ملک کو ای ڈی نے ممبئی انڈر ورلڈ کے مفرور گینگسٹر داؤد ابراہیم اور اس کے ساتھیوں کی سرگرمیوں سے متعلق منی لانڈرنگ کیس میں پوچھ گچھ کے بعد گرفتار کیا تھا۔معلومات کے مطابق داؤد کے ساتھیوں کے ساتھ مبینہ لین دین اور ان کے ساتھ زمین کے سودے کے سلسلے میں نواب ملک سے پوچھ گچھ کی گئی تھی۔
ای ڈی کا کہنا ہے کہ پوچھ گچھ کے دوران نواب ملک ٹال مٹول کر رہے تھے اور تفتیش میں تعاون نہیں کیا تھا۔ حال ہی میں انفورسمنٹ ڈائریکٹوریٹ نے کئی مقامات پر چھاپے مارے تھے اور اس معاملے میں داؤد ابراہیم کے بھائی اقبال کو بھی حراست میں لیا گیا تھا۔ ذرائع کے مطابق تفتیش کے دوران نواب ملک کی خریدی گئی جائیداد سے متعلق کچھ شواہد سامنے آئے تھے۔
