ٹوکیو، 24 مئی :(اردودنیا.اِن/ایجنسیاں) وزیراعظم نریندر مودی نے کواڈ ممالک کی طرف سے ٹوکیو میں شروع کی گئی فیلوشپ کو ایک شاندار اور منفرد پہل قرار دیا اور ہندوستانی طلباء سے اس کے لیے درخواست دینے کی اپیل کی۔ پی ایم مودی نے کہاکہ میں ہندوستانی طلبا کی حوصلہ افزائی کرتا ہوں کہ وہ کواڈ فیلوشپ پروگرام کے لیے درخواست دیں اور سائنس، ٹیکنالوجی، انجینئرنگ اور ریاضی (ایس ٹی ای ایم )کی اگلی نسل میں شامل ہوں جو انسانیت کے لیے ایک بہتر مستقبل کی تعمیر کر رہے ہیں۔
وزیر اعظم نے کہا کہ یہ باوقار فیلوشپ ہمارے طلبا کو سائنس، ٹیکنالوجی، انجینئرنگ اور ریاضی میں انڈرگریجویٹ اور ڈاکٹریٹ پروگراموں کے لیے بہترین مواقع فراہم کرے گی۔ کواڈ فیلوشپ ہر سال 100 طلباکو مالی مدد فراہم کرے گی، جس میں کواڈ کے چاروں ممالک سے 25-25 طلبہ شامل ہوں گیاور انہیں امریکہ میں معروف ایس ٹی ای ایم گریجویٹ یونیورسٹیوں میں ماسٹرز اور ڈاکٹریٹ کی ڈگریاں حاصل کرنے میں مدد ملے گی۔وزارت خارجہ کے ترجمان ارندم باغچی نے ٹویٹ کیاکہ کواڈ فیلوشپ اپنی نوعیت کا پہلا اسکالرشپ پروگرام ہے جو سائنس، ٹیکنالوجی، انجینئرنگ اور ریاضی میں آسٹریلیا، ہندوستان، جاپان اور امریکہ کو اکٹھا کرے گا۔
کواڈ فیلوشپ ایس ٹی ای ایم کے گریجویٹ طلبا کو تحقیق اور اختراع کو آگے بڑھانے کا موقع فراہم کرے گی۔وائٹ ہاؤس کی طرف سے جاری کردہ فیکٹ شیٹ کے مطابق کواڈ کانفرنس میں کہا گیا کہ کواڈ فیلوشپ پروگرام شروع ہو چکا ہے اور درخواست کا عمل 30 جون تک جاری رہے گا۔ اس کے ساتھ ساتھ فیلو شپ کے تحت فرسٹ کلاس کا آغاز اگلے سال سے ہوگا۔کواڈ فیلوشپ پروگرام میں شمٹ فیوچرز کے سی ای او ایرک بریورمین، جاپان فاؤنڈیشن کے صدر ایمب کازویوشی اومیوموٹو اور جاپان کے وزیر خارجہ کے سائنس اور ٹیکنالوجی کے مشیر پروفیسر یوچیرو ماتسوموتو نے شرکت کی۔
جاپانی وزیر اعظم فومیو کشیدہ نے کہا کہ وہ توقع کرتے ہیں کہ ان کے ملک کے طلبااس چیلنجنگ لیکن دلچسپ پروگرام کے لیے درخواست دیں گے،یہ رفاقت ہمارے چار ممالک کو جوڑنے کا ایک اور ذریعہ بنے گا۔
کواڈ گروپ دہشت گرد گروہوں کیخلاف ٹھوس کارروائی کے حق میں
کواڈ ممالک کے رہنماؤں نے منگل کو جاپان کے دارالحکومت ٹوکیو میں منعقدہ اپنی سربراہی کانفرنس کے دوران ممبئی پر 26/11 کے دہشت گردانہ حملے سمیت تمام شکلوں اور مظاہر میں دہشت گردی کی سخت الفاظ میں مذمت کی اور کہاکہ وہ تمام دہشت گرد تنظیموں کے خلاف متحد ہوکر کارروائی کریں گے۔سربراہی اجلاس کے بعد جاری ہونے والے مشترکہ بیان میں دہشت گردی کی کارروائیوں کی سختی سے مذمت کی گئی اور کہا گیا کہ کسی بھی بنیاد پر دہشت گردی کی کارروائیوں کا کوئی جواز نہیں بن سکتا۔ انہوں نے بیان میں کہاکہ ہم ایک بار پھر ہندوستان میں دہشت گردانہ حملوں کی مذمت کرتے ہیں، بشمول 26/11 ممبئی اور پٹھانکوٹ حملے۔جب کہ ہم اس بات کی تصدیق کرتے ہیں کہ عالمی دہشت گردی کے خلاف ہماری جنگ جاری ہے، ہم تمام دہشت گرد گروہوں کے خلاف ٹھوس کارروائی کریں گے، بشمول افراد اور اداروں کے جنہیں یو این ایس سی (اقوام متحدہ کی سلامتی کونسل تجویز 1999) کے مطابق تسلیم کیا گیا ہے۔
مشترکہ بیان کے مطابق کواڈ ممالک نے دہشت گردوں کے پراکسی حملوں کی روک تھام پر زور دیا اور دہشت گرد گروپوں کو کسی بھی قسم کی فوجی، مالی یا فوجی امداد اور رسد فراہم کرنے سے انکار کرنے پر زور دیا، جس کا استعمال وہ سرحدوں پر حملوں سمیت دہشت گردانہ حملوں کو شروع کرنے یا منصوبہ بنانے کے لئے کیا جاسکتاہے۔کواڈ ممالک نے اقوام متحدہ کی سلامتی کونسل کی قرارداد 2593 (2021) کی بھی توثیق کی، جس میں مطالبہ کیا گیا ہے کہ افغان سرزمین کو کسی بھی ملک کو دھمکی دینے یا حملہ کرنے، دہشت گردوں کو پناہ دینے یا تربیت دینے یا دہشت گرد حملوں کی منصوبہ بندی یا فنڈنگ کے لیے دوبارہ استعمال نہیں کیا جانا چاہیے۔
بیان میں کہا گیا ہے کہ ہم ایف اے ٹی ایف کی سفارشات کے مطابق انسداد منی لانڈرنگ اور تمام ممالک کی طرف سے دہشت گردی کی مالی معاونت سے نمٹنے کے لیے بین الاقوامی معیارات کی تشکیل پر زور دیتے ہیں۔
