نئی ہدایات کے ساتھ کھلیں گے سنیما ہال
نئی دہلی : (اردودنیا.اِن) وزارت داخلہ کی جانب سے سنیما ہال اور تھیٹروں کو زیادہ صلاحیت کے ساتھ کھولنے کی اجازت ملنے کے بعد وزارت اطلاعات و نشریات نے معیاری آپریٹنگ طریقہ کار ( ایس او پی) جاری کیا۔ اسی کے مطابق سینما ہال اور تھیٹر 100 فیصد صلاحیت کے ساتھ کھولے جاسکتے ہیں ،
لیکن سینما ہالوں یا تھیٹروں کے اندر اور باہر کے علاقے میں ہجوم سے نمٹنے ، سماجی فاصلے برقرار رکھنے اور کوویڈ پروٹوکول کے تحت تمام خصوصی انتظامات کرنے کی ہدایت دئیے گئے ہیں۔ وزارت کے ایس او پی کے مطابق ہالوں ، ویٹنگ رومز اور عام علاقوں یہاں تک کہ سینما ہال یا تھیٹر کے باہر بھی لوگوں کے درمیان ہمیشہ 6 فٹ کاجسمانی فاصلہ رکھنا لازمی ہوگا۔
ہال کے اندر داخل ہونے والے افراد کو پورے وقت کے لئے فیس کور شیلڈ یا چہرے کا ماسک پہننا لازمی ہوگا۔ہال کے داخلی اور خارجی راستوں اور عام ایریا میں ٹچ فری موڈمیں ہینڈ سینیٹائزر رکھنا لازمی ہوگا ۔
سینما دیکھنے والے لوگوں کو بھی سانس لینے کی تہذیب کے بارمیں ہدایات دی گئی ہیں۔ مثال کے طور پر کھانسنے یا چھینکنے کے دوران انہیں اپنے چہرے پر ٹشو پیپر یا رومال رکھنا ہوگا اور ادھر اُدھر ٹشو پیپر نہیں پھینکنا ہوگا۔
ہدایات کے مطابق سنیما ہال کے اندر یا باہر لوگوں کے تھوکنے پر پابندی ہوگی اور فون میں اروگیہ سیٹو ایپ کو رکھنا لازمی ہوگا۔ ہر شو کے بعد سنیما ہال ، ملٹی پلیکس اور تھیٹر کو صاف کرنے کی ہدایت دی گئی ہے۔ ٹکٹوں کی ادائیگی کو مکمل طور پر ڈیجیٹل کرنے کے احکامات دیئے گئے ہیں۔
