نئی دہلی :(اردودنیا.اِن/ایجنسیاں)محنت کبھی رائیگاں نہیں جاتی اور کامیابی کا کبھی کوئی شارٹ کَٹ نہیں ہوتا۔ 23 سالہ واتسل ناہٹا نے ورلڈ بینک میں ملازمت حاصل کرکے اس کہاوت کو سچ کردکھایا۔ ورلڈ بینک میں ملازمت کرنا امریکی یونیورسٹی سے فارغ التحصیل ہونے والے بھارتی شہری Vatsal Nahata کا خواب تھا جسے اس نے 600 ای میلز اور 80 فون کالز کے بعد بلآخر حاصل کرلی۔
ملازمت کے حوالے سے سوشل میڈیا پلیٹ فارم LinkedIn پر طویل پوسٹ شیئر کرتے ہوئے 23 سالہ واتسل ناہٹا نے بتایا کہ کس طرح وہ کتنی محنت اور مشقت کے بعد ورلڈ بینک World Bank میں جاب حاصل کرنے میں کامیاب ہوئے۔مذکورہ پوسٹ کے مطابق ملازمت کے حصول کے سفر کا آغاز تعلیم مکمل کرنے کے بعد 2020 میں کوویڈ کے دوران ہوا۔ جب بیشتر کمپنیاں اپنے ملازمین کی تعداد میں کٹوتیاں کررہی تھی۔
ان حالات سے مایوس واتسل ناہٹا کا کہنا تھا کہ یونیورسٹی سے فارغ ہونے سے دو ماہ قبل ہی ملازمت کی تلاش شروع کردی تھی تاکہ گریجویشن مکمل ہونے تک جاب مل جائے بہ صورت دیگر مجھے انڈیا واپس جانا پڑتا۔بعدازاں صرف دو ماہ کے اندر اس نے مختلف کمپنیوں کے 15 سو سے زائد ملازمین سے لنکڈ ان پر کنیکشن بنائے، 600 سے زائد ای میلز کیں اور 80 سے زائد بار فون کالز کی اور ہر بار مسترد ہوا مگر ہمت نہیں ہاری۔
قسمت کا دروازہ اتنی بار بجایا کہ بلآخر یہ کھل ہی گیا اور بیک وقت 4 مختلف جگہوں سے آفر آئی جس میں سے میں نے ورلڈ بینک کا انتخاب کیا۔واتسل ناہٹا کی پوسٹ کو 15 ہزار سے زائد افراد نے لائک کیا جب کہ سینکڑوں مایوسی کا شکار افراد میں اس پوسٹ نے امید کی نئی کرن جگا دی۔
