متھرا، 2اکتوبر:(اردودنیا.اِن/ایجنسیاں)متھرا ریلوے اسٹیشن پر آر پی ایف (ریلوے پروٹیکشن فورس) کے جوانوں کی ہوشیاری سے ایک ریلوے مسافر کی جان بچ گئی۔مسافر کو چلتی ٹرین میں دل کا دورہ پڑا تھا۔ جیسے ہی ٹرین اسٹیشن پر رکی مسافر کو پلیٹ فارم پر لایا گیا لیکن تب تک اس کی سانس اکھڑ چکی تھی۔ موقع پر لوگوں کا ہجوم جمع ہوگیا۔ اسی دوران آر پی ایف کانسٹیبل اشوک کمار وہاں پہنچ گئے۔ مسافر کی حالت دیکھ کر سمجھ لیا کہ اسے دل کا دورہ پڑا ہے۔ کانسٹیبل نے مسافر کی بیوی سے اپنے شوہر کو سی پی آر دینے کو کہا۔ بیوی نے اپنے شوہر کو منہ سے سانس دیا۔اسی دوران سپاہی نے مسافر کا سینہ دبایا جس کی وجہ سے اس کی صحت میں قدرے بہتری آئی۔
اس کے بعد مسافر کو فوری طور پر ایمبولینس کے ذریعے ضلع اسپتال لے جایا گیا۔ آر پی ایف کے انچارج انسپکٹر اودھیش گوسوامی نے بتایا کہ آر پی ایف کے جوانوں نے مریض کو ضلع اسپتال میں داخل کرایا۔ جہاں مریض کی حالت خطرے سے باہر ہے۔ واقعہ جمعہ کی رات تقریباً 12 بجے کا ہے۔چنئی کا رہائشی 67 سالہ کیشوان اپنی بیوی دیا کے ساتھ نظام الدین-ترواننت پورم سپر فاسٹ ایکسپریس میں کوچ بی4 میں سفر کر رہا تھا۔
چلتی ٹرین میں کیشوان کی طبیعت اچانک خراب ہو گئی تھی۔ جیسے ہی ٹرین متھرا جنکشن پر رکی، کیشوان کو پلیٹ فارم پر اتار دیا گیا۔ اسے سانس لینے میں تکلیف ہو رہی تھی۔مسافروں کا ہجوم اردگرد جمع ہو گیا۔ کوئی نہیں جانتا تھا کہ کیا کرنا ہے۔ پلیٹ فارم پر جمع لوگوں کو دیکھ کر آر پی ایف کانسٹیبل اشوک کمار اور نرنجن سنگھ پہنچ گئے۔ سپاہی اشوک کمار نے مسافر کی حالت دیکھ کر فوراً صورتحال کو سمجھا۔ اس کے کہنے پر دیا نے اپنے شوہر کو منہ سے سانس دیا۔
