موربی پل حادثہ: بھگوان کی ’اِچھا‘یہی تھی، منیجر دیپک پاریکھ کا مضحکہ خیز بیان

احمد آباد ، 2نومبر:(اردودنیا.اِن/ایجنسیاں)گجرات کے موربی میں 30 اکتوبر کو پیش آنے والے حادثے کے حوالے سے پولیس نے مقامی عدالت میں اپنا بیان ریکارڈ کرایا۔تفتیشی افسر اور موربی کے ڈپٹی سپرنٹنڈنٹ آف پولیس پی اے جالا نے یکم نومبر کو عدالت کو بتایا کہ معلق پل کی تاروں کو زنگ لگا ہوا ہے اور اگر ان کی مرمت کر دی جاتی تو یہ حادثہ پیش نہ آتا۔ خبر کے مطابق اوریوا کمپنی کے منیجر دیپک پاریکھ، جو پل کی دیکھ بھال کے ذمہ دار ہیں ،اور گرفتار کیے گئے نو افراد میں سے ایک ہیں، نے چیف جوڈیشل مجسٹریٹ اور ایڈیشنل سینئر سیول جج ایم جے خان کو بتایا کہ یہ خدا کی مرضی تھی کہ ایسا ناخوشگوار حادثہ پیش آیا۔

اتوار کو موربی کیبل پل حادثے میں جان گنوانے والوں کی تعداد 134 ہے۔ انڈین ایکسپریس کی خبر کے مطابق، ڈی ایس پی جالا نے گرفتار کیے گئے نو میں سے چار کا 10 روزہ ریمانڈ مانگا ہے۔ جالا نے کہاکہ پل تاروں پر تھا اور ان کی کوئی آئلنگ اور گریسنگ نہیں کی گئی تھی۔جہاں کی تاریں ٹوٹیں وہ زنگ آلود ہو گئی تھیں۔ اگر وائرنگ ٹھیک کردی جاتی تو حادثہ پیش نہ آتا۔ کیا کام کیا گیا اور کیسے کیا گیا اس کے کوئی دستاویز نہیں رکھے گئے۔

جو میٹریل خریدا گیا، استعمال کیا گیا، اس کی جانچ ابھی باقی ہے۔رپورٹ کے مطابق سرکاری وکیل ایچ ایس پنچال نے بتایا کہ اب تک کی تحقیقات سے پتہ چلتا ہے کہ ٹھیکیدار قابل انجینئر نہیں تھا اور اس نے مرمت کا کام نہیں کیا۔ ابھی تک کی تحقیقات سے پتہ چلا ہے کہ پل ایلومینیم کے تختوں کی وجہ سے گرا ہوگا۔ وکیل جی کے راول منیجر دیپک پاریکھ، دنیش بھائی مہاسکھرائے ڈیو، ٹھیکیدار پرکاش بھائی لال جی بھائی پرمار اور دیوانگ بھائی پرکاش بھائی پرمار کی جانب سے پیش ہوئے۔ راول نے عدالت کو بتایا کہ پاریکھ کا پل کی حفاظت کو یقینی بنانے میں کوئی کردار نہیں تھا۔

اس پر پاریکھ نے جج کو بتایا کہ وہ گرافک ڈیزائن کا کام دیکھ رہے ہیں اور کمپنی میں میڈیا منیجر ہیں۔ پاریکھ نے کہا کمپنی کے منیجنگ ڈائریکٹر سے لے کر نچلے درجے کے ملازمین تک، سب نے بہت کام کیا، لیکن خدا کی مرضی تھی کہ ایسا افسوسناک واقعہ پیش آیا۔ استغاثہ نے کہا کہ اوریوا کے دو منیجر پل کی مرمت اور دیکھ بھال سے متعلق معاہدے کی دیکھ بھال کے انچارج تھے اور مرمت کے کام میں شامل تھے۔ وکیل دفاع نے کہا کہ پل کی فٹنس معلوم کرنے میں دونوں منیجرز کا کوئی کردار نہیں تھا۔ دریں اثناء￿ منگل کو موربی بار ایسوسی ایشن نے متفقہ قرارداد منظور کرتے ہوئے ممبر وکلاء کی جانب سے واقعہ سے متعلق کسی بھی ملزم کا مقدمہ لڑنے سے انکار کر دیا۔

موربی پل سانحہ: گجرات کے دیو بھومی دوارکا میں 25 کشتیوں کے لائسنس منسوخ

احمد آباد ، 2نومبر:(اردودنیا.اِن/ایجنسیاں)موربی پل حادثے کے بعد دیو بھومی دوارکا انتظامیہ اور گجرات میری ٹائم بورڈ (جی ایم بی) کے عہدیداروں نے 25 کشتیوں کے لائسنس معطل کر دیئے ہیں۔ معطل کشتیوں کے مالکان مبینہ طور پر اجازت سے زیادہ مسافروں کو لائف جیکٹس کے بغیر لے جا رہے تھے۔دوارکا کے ڈپٹی کلکٹر پارتھ تلسانیا نے بتایا کہ مقامی انتظامیہ اور جی ایم بی طے شدہ وقفہ کے بعد ضابطوں کی خلاف ورزی پر کشتی مالکان کے خلاف کارروائی کرتی ہے، لیکن بدقسمتی سے پچھلے دو سے تین دنوں میں کی گئی کارروائی کو موربی سانحہ کی وجہ سے اجاگر کیا جا رہا ہے۔

عہدیدار نے بتایا کہ گزشتہ دو دنوں میں جی ایم بی نے تہوار کے دنوں میں اجازت سے زیادہ مسافروں کو لے جانے پر 25 کشتیوں کے لائسنس کو 7 دنوں کے لیے معطل کر دیا۔ اب جی ایم بی کے اہلکار زیادہ چوکس ہیں اور وہ لائف جیکٹس کے بغیر مسافروں کو لے جانے والی کشتیوں کے خلاف کریک ڈاؤن کر رہے ہیں۔

عہدیدار نے بتایا کہ اوکھا جیٹی اور بیٹ دوارکا جیٹی کے درمیان سمندری فاصلہ دو ناٹیکل میل ہے۔ تقریباً 170 سے 180 کشتیوں کے پاس زمین اور جزیرے کے درمیان مسافروں کو لے جانے کا لائسنس ہے۔ عام دنوں میں ہجوم کم ہوتا ہے لیکن تہوار کے دنوں میں بہت زیادہ ہجوم بڑھ جاتا ہے اور کشتی مالکان اکثر منافع کے لیے قوانین کی خلاف ورزی کرتے ہیں۔