ممبئی، ۴/نومبر:(اردودنیا.اِن/ایجنسیاں) ممبئی اور گاندھی نگر کے درمیان چلنے والی وندے بھارت ایکسپریس کی زد میں آنے کے واقعات کے بعدریلوے پروٹیکشن فورس کے ممبئی ڈویژن نے آوارہ مویشیوں کے تحفظ کو یقینی بنانے کے لیے کوریڈور کے ساتھ ساتھ بڑی تعداد میں گاؤں کے سرپنچوں کوخط لکھا ہے۔ اس خط میں آر پی ایف نے لکھا ہے کہ لاوارث اور آوارہ جانوروں کو ریلوے لائن کے آس پاس گھومنے کی اجازت نہیں ہے، اگر ایسا ہوا تو ان جانوروں کے مالکان کیخلاف تعزیری کارروائی کی جائے گی۔
انڈین ایکسپریس کے پاس پال گھر آر پی ایف کی طرف سے ضلع میں ریلوے لائن سے متصل دیہاتوں کو جاری کردہ نوٹس کی کاپی تقسیم کیا ہے۔ 28 اکتوبر کو لکھے گئے خط میں کہا گیا تھا کہ کئی آوارہ مویشی ریلوے ٹریک پر گھومتے ہوئے پائے گئے، جس کی وجہ سے مویشیوں کو ٹرینوں سے کچلنے کے واقعات پیش آئے۔ ان علاقوں کے سرپنچوں سے کہا گیا ہے کہ وہ اس بات کو یقینی بنائیں کہ تمام آوارہ مویشیوں کو گوشالا میں بھیجا جائے۔مہاراشٹر میں سرپنچوں اور کلکٹروں کو بھیجا نوٹس ویسٹرن ریلوے کے سینئر ڈویژنل سیکورٹی کمشنر ونیت کھرب نے کہا کہ وہ سرپنچوں اور ضلع کلکٹروں کو نوٹس بھیج کر گاؤں والوں میں آگاہی پیدا کر رہے ہیں تاکہ مویشیوں کو ریلوے ٹریک کے قریب آنے یا گھومنے سے روکا جا سکے۔
مہاراشٹر کے پال گھر سے لے کر سورت کے ادھنا تک، بہت سے چھوٹے گاؤں ہیں جن میں بڑی تعداد میں مویشی رہتے ہیں۔ حالیہ واقعات کے پیش نظر جہاں مویشی ٹرینوں کے راستے میں آئے ہیں، ہم نے ان گائوں کے سرپنچوں کو نوٹس جاری کیا ہے کہ وہ اس بات کو یقینی بنائیں کہ ان جانوروں کو کنٹرول کیا جائے اور ریلوے لائن کے قریب جانے سے روکا جائے۔ یہ حادثات صرف انجن کوہی نقصان نہیں پہنچاتے ہیں بلکہ مسافروں کی زندگیوں کو بھی خطرے میں ڈالتے ہیں۔
