مرکز کا حلف نامہ: کرونا ویکسین کے سائیڈ افیکٹ کیلئے حکومت ذمہ دار نہیں!

نئی دہلی ،29نومبر :(اردودنیا.اِن/ایجنسیاں)مرکزی حکومت نے کہا ہے کہ حکومت یقینی طور پر عوامی مفاد میں کووڈ ویکسی نیشن کے لیے لوگوں کی حوصلہ افزائی کرتی ہے ، لیکن ٹیکہ کاری قانونی ذمہ داری نہیں ہے۔ سپریم کورٹ میں داخل حلف نامہ میں مرکزی حکومت نے کہا ہے کہ کسی پر بھی ویکسین کے برے اثرات کے لیے حکومت ذمہ دار نہیں ہے۔مرکزی حکومت کا کہنا ہے کہ ویکسین کے بارے میں تمام معلومات ویکسین مینوفیکچررز اور حکومت کے ذریعہ پبلک ڈومین پر دستیاب ہیں۔ ایسی صورتحال میں سوال ہی پیدا نہیں ہوتا کہ جس شخص نے ویکسین لگوانے کے لیے رضامندی دی ہے اسے پوری طرح سے آگاہ نہیں کیا گیا ہے۔ مرکزی حکومت نے کہا ہے کہ عرضی گزار معاوضے کے لیے سول کورٹ جا سکتے ہیں۔

2 مئی کو سماعت کے دوران سپریم کورٹ نے حکومت کی کوویڈ ویکسی نیشن پالیسی کو برقرار رکھا۔ عدالت نے کہا تھا کہ یہ سائنسی شواہد پر مبنی ہے ، لیکن کسی کو ویکسین لگانے کے لیے مجبور نہیں کیا جا سکتا۔ سپریم کورٹ نے تجویز دی کہ ریاستی حکومتیں جن لوگوں کو کووڈ ویکسین نہیں لینے عوامی سہولیات استعمال کرنے سے روکنے کا حکم دیا ہے وہ واپس لیں۔22 مارچ کو تمل ناڈو ، مہاراشٹر اور مدھیہ پردیش کی حکومتوں نے کورونا ویکسین کے حوالے سے جاری کردہ اپنے رہنما خطوط کا دفاع کیا۔

سماعت کے دوران تمل ناڈو حکومت کی جانب سے اے اے جی امیت آنند تیواری نے کہا تھا کہ عوامی مقامات پر جانے کے لیے کورونا ویکسین کو لازمی قرار دینے کے پیچھے بہت بڑا عوامی مفاد ہے تاکہ کورونا انفیکشن مزید نہ بڑھے۔ انہوں نے مرکزی وزارت صحت اور خاندانی بہبود کے رہنما خطوط کا حوالہ دیا جس میں ریاستوں سے کہا گیا تھا کہ وہ 100 فیصد کورونا ویکسی نیشن حاصل کریں۔ تمل ناڈو حکومت نے کہا تھا کہ کورونا کی ویکسی نیشن تبدیلی کو روکتی ہے۔ ویکسین کے بغیر لوگ انفیکشن کے زیادہ خطرے میں ہیں۔مہاراشٹر حکومت نے کہا تھا کہ ریاستی حکومت نے عوامی مقامات جیسے دکانوں ، مالز وغیرہ میں داخل ہونے سے پہلے ویکسین لینا لازمی قرار دیا ہے۔

ریاستی حکومت کی جانب سے وکیل راہل چٹنیس نے کہا تھا کہ درخواست گزار کا یہ کہنا درست نہیں ہے کہ ویکسین کو لازمی قرار دینا آئین کے آرٹیکل 14 اور 21 کی خلاف ورزی ہے۔ ویکسی نیشن درخواست گزار کے حقوق سے بھی منسلک ہے کیونکہ یہ دوسروں کی زندگیوں کو بھی متاثر کرتی ہے۔ مدھیہ پردیش حکومت نے مرکزی حکومت کے موقف کی تائید کرتے ہوئے کہا کہ حقوق کا توازن ضروری ہے۔9 اگست 2021 کو عدالت نے کورونا ویکسین کے ٹرائل سے متعلق ڈیٹا میں شفافیت لانے کے مطالبے پر نوٹس جاری کیا تھا۔

عدالت نے کہا تھا کہ ہم کچھ معاملات پر سماعت کر رہے ہیں۔ ہم نوٹس جاری کر رہے ہیں ، لیکن ہم لوگوں کے ذہنوں میں ویکسی نیشن کے حوالے سے ابہام پیدا نہیں کرنا چاہتے۔ عدالت نے کہا تھا کہ ملک ویکسین کی کمی سے لڑ رہا ہے۔ ویکسی نیشن جاری ہے اور ہم اسے روکنا نہیں چاہتے۔ آپ کو ویکسین کی حفاظت کے بارے میں کوئی شک نہیں ہونا چاہئے۔ یہ درخواست ان لوگوں میں الجھن پیدا کرے گی جنہوں نے ویکسین لگوائی ہے۔