ایئر انڈیا کیس: مسافر خاتون پر پیشاب کے ملزم شنکر مشرا کو ملی ضمانت

نئی دہلی،31جنوری:(اردودنیا.اِن/ایجنسیز) ایئر انڈیا پیشاب اسکینڈل کیس کے ملزم شنکر مشرا کو ضمانت مل گئی ہے۔ پٹیالہ ہاؤس کورٹ نے شنکر مشرا کو ایک لاکھ روپے کی ضمانت پر ضمانت دی ہے۔ اس سے قبل عدالت نے پیر کو سماعت مکمل کرتے ہوئے فیصلہ محفوظ کر لیا تھا۔ ایڈیشنل سیشن جج ہرجیوت سنگھ نے منگل 31 جنوری کو فیصلہ سنایا۔ شنکر مشرا کو 6 جنوری کو گرفتار کیا گیا تھا۔ ملزم شنکر مشرا پر گزشتہ سال 26 نومبر کو نیویارک سے دہلی جانے والی ایئر انڈیا کی پرواز میں ایک خاتون مسافر پر پیشاب کرنے کا الزام ہے۔ حالانکہ اس نے الزام کی تردید کی تھی۔ اس کیس کی سماعت کے دوران جسٹس بھلا نے کہا تھا کہ تفتیشی ایجنسی نے جس گواہ کا نام لیا ہے وہ ان کے حق میں گواہی نہیں دے رہا ہے۔شکایت کنندہ کے بیان اور گواہ کے بیان میں تضاد ہے۔ملزم شنکر مشرا کے وکیل نے عدالت کو بتایا کہ شکایت کنندہ نے واقعہ کے بعد ٹکٹ کا معاوضہ طلب کیا تھا اور ملزم کیخلاف کوئی کارروائی نہ کرنے کا بھی مطالبہ کیا تھا۔

دہلی پولیس کے وکیل نے شنکر مشرا کی ضمانت کی درخواست کی مخالفت کی۔ دہلی پولیس نے مشرا پر تحقیقات میں تعاون نہ کرنے کا الزام لگایا اور ان کی ضمانت کی درخواست کی مخالفت کی۔شکایت کنندہ خاتون کی طرف سے پیش ہونے والے وکیل انکور مہندرا نے ہفتہ (14 جنوری) کو جواب دیا کہ ملزم شنکر مشرا غلط معلومات پھیلا رہا ہے۔ ایسا کر کے وہ متاثرہ کو پریشان کر رہاہے اسے اپنے اس گھناؤنے فعل پر افسوس ہونا چاہیے تھا لیکن وہ جھوٹ بول رہا ہے۔امریکہ میں آڈیالوجی کے ایک ڈاکٹر بھٹاچاریہ نے بتایا کہ انہوں نے مسافر کے بارے میں پہلے ہی کیبن کریو کو آگاہ کر دیا تھا کیونکہ وہ مکمل طور پر نشے کی حالت میں نظر آرہا تھا۔ ٹیک آف کے تقریباً ایک گھنٹہ بعد مسافروں کو دوپہر کا کھانا دیا گیا اور 40 منٹ میں اس نے چار بوتلیں چڑھالیں ، جب اس نے یہ بات عملے کو بتائی تو وہ صرف مسکرائے۔ اس کے بعد بھی ملزم کو مزید شراب پلائی گئی، بعد ازاں وہ آپے سے باہر ہوگیا۔