مسلم پرسنل لا بورڈ کے صدر مولانا رابع حسنی ندوی علیل،اسپتال میں داخل

لکھنؤ ،8پریل :(اردودنیانیوز.کام/ایجنسیز) آل انڈیا مسلم پرسنل لا بورڈ کے صدر مولانا رابع حسنی ندوی کی طبیعت بگڑ گئی ہے۔ انہیں رائے بریلی سے لکھنؤ لایا گیا ہے اور اسپتال میں داخل کرایا گیا ہے۔ بتایا جا رہا ہے کہ نمونیا اور سانس لینے میں دشواری کی وجہ سے انہیں ہسپتال میں داخل کرایا گیا ہے۔ ڈاکٹروں کی ٹیم علاج میں مصروف ہے۔بتادیں کہ مولانا رابع حسنی ندوی اپنی بے باکی کے لیے جانے جاتے ہیں۔ وہ اکثر معاشرے کے لوگوں کو مذہبی معاملات کے حوالے سے مشورے دیتے رہتے ہیں۔ ایک ملاقات میں انہوں نے افسوس کا اظہار کیا کہ مسلمانوں نے دین اسلام کو صرف نماز تک محدود کر دیا ہے اور سماجی معاملات کو نظرانداز کیا جا رہا ہے۔انہوں نے کہا کہ شادیوں میں جہیز دینے کی بجائے جائیداد میں لڑکیوں کو ان کا حقیقی حق دیا جائے۔

مولانا رابع حسنی ندوی نے کہا کہ دین اسلام زندگی کے تمام شعبوں میں ہماری رہنمائی کرتا ہے۔ اس لیے مسلمانوں کو ہر میدان میں حلال و حرام کا خیال رکھنا چاہیے۔ اسلام کو صرف نماز تک محدود نہیں رکھنا چاہیے۔ اسلامی شریعت کو بدنام کیا جا رہا ہے۔انہوں نے کہا کہ مسلمانوں کو معاشرتی رسوم و رواج سے بچ کر سنت اور شریعت کے مطابق شادی کرنی چاہیے۔ شادی میں جہیز دینے کی بجائے لڑکی کو جائیداد میں اس کا حق دیا جائے۔ شادی کے دوران اسلامی ہدایات پر عمل کرنا چاہیے۔ تاکہ کوئی مسلمان لڑکی اپنے گھر میں غیر شادی شدہ نہ بیٹھے۔ انہوں نے کہا کہ اس کے لیے شادیوں کو آسان بنایا جائے اور بغیر جہیز کے شادیاں ہوں۔