ایران: بااثر عالم مسلح حملے میں جاں بحق، حملہ آور گرفتار-ویڈیو وائرل
آیت اللہ عباس علی سلیمانی کو مسلح شخص نے فائرنگ کرکے قتل کردیا،
تہران ،26اپریل:(اردودنیانیوز.کام/ایجنسیز) ایران کے بااثر اور معروف عالم آیت اللہ عباس علی سلیمانی Ayatollah Abbas Ali Soleimani مسلح حملے میں جاں بحق ہوگئے جبکہ حملہ آور کو گرفتار کرلیا گیا۔غیر ملکی خبر رساں ایجنسی ’اے ایف پی‘ کے مطابق ایران کے بااثر عالم اور سپریم لیڈر کا انتخاب کرنے والی اسمبلی کے رکن آیت اللہ عباس علی سلیمانی کو مسلح شخص نے فائرنگ کرکے قتل کردیا، تاہم حملے آور کو گرفتار کرلیا گیا ہے۔ایران کی سرکاری خبر رساں ایجنسی ’آئی آر این اے‘ کے مطابق آیت اللہ عباس علی سلیمانی کو صبح کے وقت مسلح حملہ میں قتل کردیا گیا۔رپورٹ کے مطابق مذہبی شخصیت پر حملہ ایران کے شمالی صوبے مازندران کے شہر بابولسر میں ہوا۔
🎥 فیلمی از لحظه سوء قصد به آیتالله سلیمانی https://t.co/D13szoJuPL pic.twitter.com/49ugV6wxQi
— خبرگزاری تسنیم 🇮🇷 (@Tasnimnews_Fa) April 26, 2023
حکام کا کہنا ہے کہ حملے کا مقصد ابھی واضح نہیں ہے لیکن اس کا تعین کرنے کے بعد اعلان کیا جائے گا۔صوبہ مازندران کے گورنر محمود حسینی پور نے کہا کہ حملہ آور مقامی بینک کا سیکیورٹی اہلکار ہے۔گورنر نے سرکاری ٹیلی ویژن پر کہا کہ تاحال ہماری معلومات اور دستاویزات سے یہ ظاہر ہوتا ہے کہ یہ کوئی دہشت گردی یا سکیورٹی کا معاملہ نہیں تھا۔قبل ازیں آیت اللہ عباس علی سلیمانی سپریم لیڈر آیت اللہ خامنہ ای کے نمائندے تھے۔رپورٹ کے مطابق آیت اللہ عباس علی سلیمانی امام بھی رہ چکے ہیں جنہوں نے صوبہ اصفہان کے وسطی شہر کاشان اور جنوب مشرقی صوبہ سیستان بلوچستان کے شہر زاہدان میں ہفتہ وار نماز جمعہ کی امامت کی تھی۔
