مسلم خواتین کیخلاف قابل اعتراض پوسٹ کرنے پر آر ایس ایس کارکن گرفتار

رائچور،2 جون :(اردودنیانیوز.کام/ایجنسیز)کرناٹک پولیس نے رائچور ضلع میں آر ایس ایس کے ایک کارکن کو مسلم خواتین کیخلاف سوشل میڈیا پر قابل اعتراض پوسٹ کرنے پر گرفتار کیا ہے۔ پولیس نے جمعہ کو اس کی جانکاری دی ہے۔ جمعرات کو اس پوسٹ کے وائرل ہونے کے بعد مسلم کمیونٹی کے ارکان نے احتجاج کیا اور ملزم کی گرفتاری کا مطالبہ کیا۔ مظاہرین نے تھانے کا گھیراؤ کر کے ملزمان کی گرفتاری کے لیے 24 گھنٹے کی مہلت دے دی۔ گرفتار آر ایس ایس کارکن کی شناخت راجو تمبک کے طور پر ہوئی ہے۔ پولیس نے بتایا کہ ملزم نے سوشل میڈیا پر ایک پوسٹ ڈالی تھی جس میں مسلمان خواتین کو بچہ پیدا کرنے والی مشین کے طور پر پیش کیا گیا تھا۔

آر ایس ایس کارکن کی پوسٹ وائرل ہوگئی اور مسلم کمیونٹی نے راجو تمبک پر ان کے مذہبی جذبات کو ٹھیس پہنچانے کا الزام لگایا اور لنگاسوگور پولیس سے مطالبہ کیا کہ وہ ملزم کو فوری طور پر گرفتار کرے۔ واقعہ کے بعد سے لنگاسوگور قصبے میں حالات کشیدہ ہیں۔ پولیس نے کسی بھی ناخوشگوار واقعے سے بچنے کے لیے علاقے میں پولیس نفری کے ساتھ سکیورٹی بڑھا دی ہے،واقعہ کی مزید تفتیش جاری ہے۔