نئی دہلی ، 18جولائی:(اردودنیانیوز.کام/ایجنسیز) پاکستانی خاتون سیما حیدر گرفتار ہونے سے پریشان تھی۔ وہ اپنے 4 بچوں اور عاشق سچن مینا کے ساتھ فرار ہونے کی کوشش میں تھی۔نوئیڈا پولیس نے منگل کو بتایا کہ سیما بغیر ویزا کے غیر قانونی طور پر ہندوستان آئی تھی اور اپنے عاشق سچن مینا کے ساتھ رہ رہی تھی۔ ان دونوں کی ملاقات سنہ 2019 میں ایک آن لائن گیم پب جی (PUBG) کھیلتے ہوئے ہوئی تھی۔ پولیس کا دعویٰ ہے کہ سیما حیدر نے گرفتاری سے بچنے کے لیے فرار ہونے کا منصوبہ بنایا تھا۔ سیما سے پیر کو اتر پردیش پولیس کے انسداد دہشت گردی دستہ نے پوچھ گچھ کی تھی۔نوئیڈا پولیس کی طرف سے درج کی گئی ایف آئی آر کے مطابق، سیما نے انہیں بتایا کہ جب انہیں ہندوستان کا ویزا نہیں مل سکا۔ چنانچہ وہ نیپال چلی گئی اور پھر وہاں سے نئی دہلی کے لیے بس سے چلی گئی۔ سیما نے بتایا کہ وہ 13 مئی کو اپنے 4 بچوں کے ساتھ یمنا ایکسپریس وے پہنچی، جہاں سچن کا انتظار تھا۔

وہ ہمیں گریٹر نوئیڈا کے محلہ امبیڈکر نگر میں کرائے کے مکان میں لے گیا۔ غیر قانونی تارکین وطن کو پناہ دینے کے الزام میں گرفتار سچن مینا نے پولیس کو بتایا کہ اس نے سیما کو اپنے والد سے ملوایا اور اس سے شادی کرنے کے اپنے ارادے کے بارے میں بتایا تھا۔سیما کے بارے میں سچن کے والد نے کہا تھا کہ اگر وہ ہندوستانی طرز زندگی کو اپناتی ہیں تو وہ شادی کی اجازت دیں گے۔ سیما نے بھی اس سے اتفاق کیا۔ اس کے بعد سچن اپنے آبائی شہر چلا گیا اور کچھ دنوں کے بعد سچن کے والد ان کے گھر آئے اور اسے بلند شہر کی ایک عدالت میں لے گئے تاکہ کورٹ میرج کے لیے ایک وکیل سے ملوایا جائے۔

جب سیما نے اسے اپنے کاغذات دکھائے تو وکیل نے سیما سے کہا کہ وہ سچن سے شادی نہیں کر سکتی کیونکہ سیما ہندوستانی شہری نہیں ہے۔وکیل سے ملنے کے فوراً بعد سیما اپنے بچوں کے ساتھ وہاں سے جانا چاہتی تھی۔ اسے معلوم تھا کہ وکیل پولیس کو اطلاع دے گا اور پولیس اسے گرفتار کر لے گی۔ سیما نے پولیس کو بتایا کہ ہم نے کرائے کا مکان فوری طور پر خالی کر دیا تھا اور دہلی جانا چاہتے تھے، ہم نے سچن کے والد سے رقم بھی ادھار لی تھی لیکن پولیس نے وہاں پہنچ کر ہمیں گرفتار کر لیا۔خیال رہے کہ کئی میڈیا گروپ نے سیما -سچن کو رشتے کو پیار کارشتہ بتا کر خوب واہ واہی بٹورنے میں کامیاب ہوئے ہیں۔

سیما حیدر سے نوئیڈا کے اے ٹی ایس دفتر میں دوسرے دن بھی پوچھ گچھ

 پاکستان سے ہندوستان آنے والی خاتون سیما حیدر سے پوچھ گچھ جاری ہے۔ یوپی اے ٹی ایس سچن کے والد کو ربوپورہ میں واقع ان کے گھر سے لے کر آئی تھی اور پیر 17 جولائی کو اے ٹی ایس کے دفتر میں ان سے پوچھ گچھ کی گئی، پھر دیر رات انہیں گھر چھوڑ دیا تھا۔اس کے بعد آج اے ٹی ایس سیما کو لے کر نوئیڈا کے سیکٹر 58 میں اے ٹی ایس دفتر لے کر گئی۔ جہاں اس سے پوچھ گچھ کی گئی۔سیما کو گھر سے اٹھانے کے بعد یہ قیاس کیا جا رہا تھا کہ اے ٹی ایس سیکٹر 94 میں واقع اس کے دفتر پہنچ جائے گی لیکن ٹیم اسے سیکٹر 58 میں واقع اپنے دفتر لے گئی۔ جہاں اس سے پوچھ گچھ کی گئی۔ اے ٹی ایس کی ٹیم کے پاس کئی سوالات ہیں جن کے جواب تلاش کرنے کی کوشش کر رہی ہے۔ ان میں سرحد کے قریب سے ملنے والا موبائل سم کارڈ اور اس کے ہندوستان آنے کا روٹ میپ شامل ہے۔بتایا جا رہا ہے کہ اے ٹی ایس مرکزی انٹیلی جنس ایجنسیوں کے ساتھ مل کر سیما کی پاکستان سے یوپی منتقلی اور اس کے رابطے کی جانچ کر رہی ہے۔

اے ٹی ایس مرکزی انٹیلی جنس ایجنسیوں کے ساتھ مل کر پاکستان سے دبئی اور پھر نیپال کے راستے ہندوستان جانے کے پورے نیٹ ورک کی جانچ کر رہی ہے۔ سیما نے ہندوستان آنے پر کن موبائل نمبروں کا استعمال کیا، اس کی بھی چھان بین کی جا رہی ہے۔ذرائع کا یہ بھی دعویٰ ہے کہ سینٹرل انٹیلی جنس ایجنسی سیما حیدر کے پاکستان میں موجود رابطوں کے ذریعے اس کی مکمل پروفائل کا پتہ لگا رہی ہے۔ اس کے گھر اور خاندان کے بارے میں بھی معلومات اکٹھی کی جا رہی ہیں۔ سیما کے چچا کے پاکستانی فوج میں صوبیدار ہونے کا انکشاف ہوا ہے۔ اس کے علاوہ سیما کا بھائی بھی پاکستانی فوج میں ہے۔ ایسے میں تفتیشی اداروں کو شبہ ہے کہ سیما حیدر کا پاکستانی خفیہ ایجنسی آئی ایس آئی سے کوئی تعلق تو نہیں ہے۔