مہاراشٹر:پرتھوی راج چوہان کا سنسنی خیز دعویٰ کہا، 10اگست کے آس پاس اجیت پوار ہوں گے صوبہ کے وزیراعلیٰ

ممبئی، 24جولائی:(اردودنیانیوز.کام/ایجنسیز) سینئر کانگریس لیڈر پرتھوی راج چوان نے پیر کو دعویٰ کیا کہ این سی پی لیڈر اجیت پوار کو 10 اگست کے آس پاس مہاراشٹر کا وزیر اعلی بنایا جائے گا، شیو سینا لیڈر ایکناتھ شندے کی جگہ لیں گے ۔ انہوں نے دعویٰ کیا کہ سی ایم شندے اور شیوسینا کے دیگر 15 ایم ایل ایز کی نااہلی کا فیصلہ 10 اگست کے آس پاس کیا جائے گا۔ جہاں پرتھوی راج چوہان بڑے بڑے دعوے کر رہے ہیں وہیں ڈپٹی سی ایم دیویندر فڑنویس نے پیر کو ہی واضح کر دیا ہے کہ سی ایم ایکناتھ شندے اپنے عہدے پر ہی فائز رہیں گے ۔ سابق وزیر اعلیٰ نے دعویٰ کیا کہ ایکناتھ شندے اور دیگر ایم ایل ایز کی نااہلی کے فیصلے کے بعد موجودہ نائب وزیر اعلیٰ اجیت پوار کو 10 اگست کے قریب وزیر اعلیٰ بنایا جائے گا۔ چوہان نے یہ بھی دعویٰ کیا کہ بی جے پی اگلے لوک سبھا انتخابات ایکناتھ شندے کی قیادت میں لڑنے کی خواہش مند نہیں ہے کیونکہ ان کا اپنے آبائی ضلع تھانے سے باہر کوئی اثر و رسوخ نہیں ہے۔

پرتھوی راج چوہان نے کہا کہ بی جے پی کے پاس اب متبادل کے طور پر صرف اجیت پوار ہیں۔ چوہان نے مزید الزام لگایا کہ استعمال اور پھینکنا پی ایم مودی کا طریقہ کار ہے۔ یہ ایکناتھ شندے کا نصیب ہے۔ بی جے پی کی اعلیٰ قیادت کی طریقۂ کار سے یہ ظاہر ہوتا ہے کہ وہ اجیت پوار کو وزیر اعلیٰ اور انتخابی چہرہ بنانا چاہتے ہیں۔ اس کے بعد اجیت پوار کو خزانہ جیسا اہم محکمہ سونپا گیا۔ حالانکہ ایکناتھ شندے نے کہا ہے کہ انہیں اجیت پوار سے خطرہ نہیں ہے۔پرتھوی راج چوہان کے بڑے دعوے کے برعکس دیویندر فڑنویس نے کہا ہے کہ تمام پارٹی ممبران کے ذہن میں یہ بات واضح ہے کہ ایکناتھ شندے ہی وزیر اعلیٰ رہیں گے اور اگر اپوزیشن کسی قسم کا کنفیوژن پیدا کرنے کی کوشش کرے گی تو سمجھ لیں کہ وہ پتنگ اڑ رہے ہیں اور ان کی پتنگ کسی بھی وقت کٹ سکتی ہے۔