جے پور-ممبئی ٹرین فائرنگ : برقعہ پوش خاتون کو بندوق کی نوک پر بھارت ماتا کی جئے کہنے پر مجبور کیا

ممبئی:(اردودنیانیوز.کام/ایجنسیز) جے پور-ممبئی سپر فاسٹ ایکسپریس میں آر پی ایف کے چیتن سنگھ  نے چار لوگوں کو گولی مار کر ہلاک کر دیا تھا۔ اس معاملے میں پولیس ایف آئی آر درج کر کے تحقیقات کر رہی ہے۔ تفتیش کے دوران پتہ چلا کہ کانسٹیبل نے ایک برقعہ پوش خاتون کو بندوق کی نوک پر بھارت ماتا کی جئے کہنے پر مجبور کیا تھا۔ انڈین ایکسپریس کے مطابق ممبئی کے بوریولی (جی آر پی) ریلوے اسٹیشن کی پولیس معاملے کی تحقیقات کر رہی ہے۔ ایسے میں ایک خاتون پولیس کے سامنے آگئی ہے۔ اس خاتون نے پولیس کو دیے گئے بیان میں کہا ہے کہ اس صبح آر پی ایف جوان نے بھی اس کے ساتھ بدتمیزی کی تھی۔ پولیس نے اس کیس میں اس خاتون کو بھی گواہ بنایا ہے۔ اس کے علاوہ یہ پورا واقعہ ٹرین میں نصب سی سی ٹی وی کیمرے میں بھی ریکارڈ ہو گیا ہے۔

خاتون نے پولیس کو دیے گئے بیان میں بتایا ہے کہ وہ برقعہ پہن کر B-3 کوچ میں سفر کر رہی تھی۔ اسی دوران کانسٹیبل(چیتن چودھری )انکے کے پاس آیا اور کہا کہ بھارت ماتا کی جئے کہو۔ اس دوران عورت نے اس سے پوچھا تم کون ہو؟ جواب میں کانسٹیبل نے بندوق عورت کی طرف بڑھاتے ہوئے کہا- زور سے بولو بھارت ماتا کی جے۔ خاتون ڈر گئی اور بھارت ماتا کی جئے کے نعرے لگائے۔ اس کے ساتھ ہی خاتون نے الزام لگایا کہ کانسٹیبل نے کہا – اگر وہ اس کے ہتھیار کو چھوئے تو وہ اسے مار ڈالے گا۔ اسی ٹرین میں چودھری نے اپنے سینئر تکارام مینا اور تین مسافروں عبدالقادر محمد حسین بھانپور والا، سید سیف الدین اور اصغر عباس شیخ کو گولی مار کر ہلاک کر دیا۔

پولیس نے مختلف دفعات کے تحت مقدمہ درج کر لیا۔ملزم کو پولیس نے گرفتار کر لیا جسے بعد ازاں عدالتی تحویل میں جیل بھیج دیا گیا۔ چیتن سنگھ چودھری پر آئی پی سی کی دفعہ 153 اے (مذہب، نسل، مقام پیدائش، رہائش کی بنیاد پر مختلف گروہوں کے درمیان دشمنی کو فروغ دینا)، 302 (قتل)، 363 (اغوا)، 341 (غلط طریقے سے روکنا)، 342 (غلط طریقے سے روکنا) کے تحت مقدمہ درج کیا گیا ہے۔ آئی پی سی کے تحت درج کیا گیا ہے.