مہاراشٹر، آندھرا پردیش اور کرناٹک میں آج بند ، وجوہات الگ الگ
ملک کی تین ریاستوں میں آج بند کا اعلان کیا گیا ہے۔
نئی دہلی ، 11ستمبر:(اردودنیانیوز.کام/ایجنسیز)ملک کی تین ریاستوں میں آج بند کا اعلان کیا گیا ہے۔ جس میں مہاراشٹر، کرناٹک اور آندھرا پردیش شامل ہیں۔ ایک طرف مراٹھا تنظیم نے مہاراشٹر کے تھانے ضلع میں بند کا اعلان کیا ہے۔ دوسری جانب آندھرا پردیش میں ٹی ڈی پی نے پارٹی سربراہ اور سابق وزیر اعلی چندرا بابو نائیڈو کی گرفتاری کے خلاف بند کی کال دی ہے۔ وہیں کرناٹک میں فیڈریشن آف کرناٹک اسٹیٹ پرائیویٹ ٹرانسپورٹ ایسوسی ایشن کی جانب سے بند کا اعلان کیا گیا ہے، جس کے تحت آج لاکھوں گاڑیاں سڑکوں پر نظر نہیں آئیں گی۔ ایسوسی ایشن کی جانب سے اعلان کردہ بند کے پیش نظر، جس میں تقریباً آٹو۔ رکشہ، ٹیکسی، میکسی کیبس اور بسیں، پیر کو بنگلورو میں نو لاکھ نجی تجارتی گاڑیاں سڑکوں سے دور رہیں گی۔آندھرا پردیش کے سابق وزیر اعلی چندرا بابو نائیڈو کو اسکل ڈیولپمنٹ کارپوریشن گھوٹالے کے سلسلے میں کریمنل انویسٹی گیشن ڈیپارٹمنٹ (سی آئی ڈی) نے گرفتار کرلیا ہے۔
تیلگو دیشم پارٹی (ٹی ڈی پی) نے ہفتہ کو کہا کہ سی آئی ڈی نے نائیڈو کو نندیال میں گرفتار کیا۔ وجئے واڑہ اے سی بی کورٹ نے نائیڈو کو 14 دن کے لیے عدالتی حراست میں بھیج دیا ہے۔ عدالت نے ٹی ڈی پی سربراہ کی گھر پر نظربندی کا مطالبہ کرنے والی درخواست پر اپنا فیصلہ محفوظ کرلیا ہے۔دریں اثنا، نائیڈو کی پارٹی نے پیر کو آندھرا پردیش میں بند کی کال دی ہے۔ تلگودیشم پارٹی کے سربراہ این چندرابابو نائیڈو 14 دن کی عدالتی حراست میں بھیجے جانے کے بعد پیر کی صبح سنٹرل جیل پہنچے۔ وہ مشرقی گوداوری ضلع میں وجئے واڑہ سے راجہ مہندراورم تک تقریباً 200 کلومیٹر کا سفر طے کر کے جیل پہنچے۔ مشرقی گوداوری ضلع کے پولیس سپرنٹنڈنٹ پی جگدیش نے کہا، ’’چندر بابو نائیڈو رات تقریباً 1:20 بجے جیل میں گئے۔
اگست کے اختتام کی آخری تاریخ کے اندر ٹرانسپورٹ یونین کے 28 مطالبات کو پورا نہ کرنے پر ریاستی محکمہ ٹرانسپورٹ نے ہڑتال کی کال دی ہے۔ تاہم بند کے دوران ہنگامی خدمات اور روزانہ ضروری ٹرانسپورٹ خدمات جاری رہیں گی۔ صورتحال کے پیش نظر بعض اسکولوں نے تعطیلات کا اعلان بھی کیا ہے۔ فیڈریشن آف کرناٹک اسٹیٹ پرائیویٹ ٹرانسپورٹ ایسوسی ایشنز، جس میں کل 32 پرائیویٹ ٹرانسپورٹ یونینز شامل ہیں، نے کہا کہ اس نے بند کے ایک حصے کے طور پر شہر کے سنگولی ریانا سرکل سے فریڈم پارک تک ایک احتجاجی مارچ کا اہتمام کیا ہے۔ْ
سرکاری ذرائع نے بتایا کہ چونکہ پرائیویٹ میکسی کیب بہت سے اسکولی بچوں کے لیے نقل و حمل کا ایک اہم ذریعہ ہے، اس لیے شہر کے کچھ اسکولوں نے طلبا کو تکلیف سے بچنے کے لیے پیر کو چھٹی کا اعلان کیا ہے۔ فیڈریشن کے صدر ایس نٹراج شرما نے کہا کہ تقریباً 7 سے 10 لاکھ گاڑیاں جن میں آٹوز، ٹیکسیاں، ایئرپورٹ ٹیکسی، میکسی کیبس، گڈز گاڑیاں، اسکول کی گاڑیاں، اسٹیج کیریجز، کنٹریکٹ کیریجز اور کارپوریٹ بسیں شامل ہیں، آج سڑکوں سے غائب ہیں۔
