میہول چوکسی کو بامبے ہائی کورٹ سے جھٹکا،مفرور قرار دینے کیخلاف دائر کی گئی درخواست ہائی کورٹ نے کیا خارج

ممبئی، 21ستمبر:(اردودنیانیوز.کام/ایجنسیز) بامبے ہائی کورٹ نے جمعرات کو کروڑوں کے بینک گھوٹالے کے ملزم تاجر میہل چوکسی کی ان درخواستوں کو مسترد کر دیا جس میں اس نے انفورسمنٹ ڈائریکٹوریٹ (ای ڈی) کی اس دردخواست کو چیلنج کیا تھا جس میں اسے مفرور اقتصادی مجرم (ایف ای او) قرار دیا گیا تھا۔جسٹس ایس وی کوتوال نے چوکسی کی درخواستوں میں اپنا فیصلہ سناتے ہوئے دفاع کے دعوں کو مسترد کردیا جس میں تفتیشی ایجنسی کے طریقہ کار کے غیرقانونی عمل کا الزام لگایا گیا تھا اور ای ڈی کی درخواستوں کو چیلنج کیا گیا تھا۔ عدالت عالیہ نے کہا کہ ای ڈی کی درخواست اصولوں کے تحت دائر کی گئی ہے اور ان کی نظر میں ہو غلط نہیں ہے۔ ہائی کورٹ نے میہل چوکسی کی طرف سے دائر چاروں درخواستوں کو فوری اثر سے مسترد کر دیا۔واضح رہے کہ محکمہ ای ڈی نے گزشتہ دنوں خصوصی پی ایم ایل اے کورٹ میں عضداشت داخل کی تھی اور چوکسی کو مفرور اقتصادی مجرم قرار دینے کی اجازت طلب کی تھی نیز اس اجازت کے بعد ایف ای او ایکٹ، 2018 کی دفعہ 4 اور 12 کے رو سے ملزم کی جائیدادوں کو ضبط کرنے کا راستہ ہموار ہوجائے گا۔

قانون کے مطابق کسی بھی شخص کو ایف ای او قرار دیا جا سکتا ہے اگراس کے خلاف 100 کروڑ روپے یا اس سے زیادہ کی رقم کے جرائم کے تحت وارنٹ جاری کیا گیاہو، یا اگر وہ شخص ملک چھوڑ کر چلا گیا ہے یا اسکی واپسی کے کوء آثار نظر نہیں آتے ہو۔ارب پتی سونے کے بیوپاری نیرو مودی اور گیتانجلی جیمز کے پروموٹر ان کے چچا میہول چوکسی نے مبینہ طور پر کروڑوں کی دھوکہ دہی کا ارتکاب کیا تھا۔چوکسی اور مودی پر الزام ہے کہ انہوں نے دھوکہ دہی کے دعووں پر مبنی پنجاب نیشنل بینک (پی این بی) سمیت ہندوستانی بینکوں کی غیر ملکی شاخوں کے حق میں 12636 کروڑ روپے کے لیٹر آف انڈرٹیکنگ (ایل او یو) اور غیر ملکی لیٹر آف کریڈٹ (ایف ایل سی) حاصل کیے ہیں۔