مہاراشٹر کے سرکاری اسپتالوں میں موت کا ننگا ناچ جاری,نانڈیڑکے اب ناگپور میں 24 گھنٹے میں 25 مریض لقمہ اجل

ناگپور، 4اکتوبر:(اردودنیانیوز.کام/ایجنسیز) مہاراشٹر کے ناندیڑ اور اورنگ آباد کے بعد اب ناگپور کے سرکاری اسپتال میں 24 گھنٹے کے اندر 25 مریضوں کی موت ہوگئی ہے۔ یہ اموات یہاں کے دو مختلف سرکاری اسپتالوں میں ہوئی ہیں۔اس سے پہلے، مہاراشٹر کے چھترپتی سمبھاجی نگر میں واقع گورنمنٹ میڈیکل کالج اینڈ اسپتال (جی ایم سی ایچ) میں منگل کی صبح 8 بجے تک 24 گھنٹوں کے اندر کم از کم 18 اموات ریکارڈ کی گئیں۔ اس سے پہلے مراٹھواڑہ کے ناندیڑ میں ڈاکٹر شنکر راؤ چوہان گورنمنٹ میڈیکل کالج اینڈ اسپتال میں 30 ستمبر سے 1 اکتوبر کے درمیان 24 گھنٹوں میں 24 اموات ریکارڈ کی گئی تھیں۔ اس کے بعد یکم سے 2 اکتوبر کے درمیان مزید سات اموات ریکارڈ کی گئیں، جس سے 48 گھنٹوں میں اموات کی کل تعداد 31 ہوگئی تھی۔اسپتال کے میڈیکل سپرنٹنڈنٹ نے کہا کہ گورنمنٹ میڈیکل کالج اینڈ اسپتال، چھترپتی سمبھاجی نگر میں 2 اکتوبر کی صبح 8 بجے سے 3 اکتوبر کی صبح 8 بجے کے درمیان 18 اموات ریکارڈ کی گئیں۔

انہوں نے کہا کہ جی ایم سی ایچ میں درج 18 اموات میں سے چار افراد کو اسپتال میں مردہ لایا گیا تھا۔میڈیکل سپرنٹنڈنٹ نے کہا کہ جاں بحق 18 افراد میں سے دو مریضوں کی موت دل کا دورہ پڑنے سے ہوئی، جب کہ دو دیگر نمونیا میں مبتلا ھے۔ جان کی بازی ہارنے والے دیگر تین مریض گردے فیل ہونے اور ایک اور مریض جگر کی خرابی میں مبتلا تھا۔ جگر اور گردے فیل ہونے سے ایک اور مریض دم توڑ گیا۔ سڑک حادثہ، زہریلی چیز کھانے اور اپنڈکس پھٹنے سے ایک ایک شخص کی موت کی خبر ہے۔دوسری جانب ریاستی محکمہ صحت کے حکام نے بتایا کہ ناندیڑ کے ڈاکٹر شنکر راؤ چویان گورنمنٹ میڈیکل کالج اینڈ اسپتال میں 30 ستمبر سے یکم اکتوبر کے درمیان 24 گھنٹوں میں 12 شیر خوار بچوں سمیت 24 افراد کی موت ہوئی۔ اسپتال کے ایک سینئر ڈاکٹر نے بتایا کہ جب 30 ستمبر سے یکم اکتوبر کے درمیان سرکاری اسپتال میں 11 شیر خوار بچوں کی موت ہوئی تھی، اس وقت 24 بستروں کی منظور شدہ گنجائش کیخلاف نوزائیدہ انتہائی نگہداشت یونٹ (NICU) میں کل 65 مریضوں کا علاج کیا جا رہا تھا۔