شاہی عیدگاہ-کرشن جنم بھومی کیس: مسجد کی زمین ہندؤوں کو دینے کی درخواست خارج

الٰہ آباد، 11اکتوبر:(اردودنیانیوز.کام/ایجنسیز) الہ آباد ہائی کورٹ نے متھرا کی شاہی عیدگاہ مسجد کو ہٹانے اور اس کے احاطے کو ہندوؤں کے حوالے کرنے کا مطالبہ مسترد کر دیا۔درخواست میں شاہی عیدگاہ مسجد کو ہٹانے اور کمپلیکس کو ہندوؤں کے حوالے کرنے اور اسے کرشنا کی جائے پیدائش کے طور پر تسلیم کرنے کا مطالبہ کیا گیا تھا۔ چیف جسٹس پریتنکر دیواکر اور جسٹس آشوتوش سریواستو کی بنچ نے گزشتہ ماہ اس کیس پر اپنا فیصلہ محفوظ رکھا تھا۔ایڈوکیٹ مہک مہیشوری نے یہ عرضی 2020 میں دائر کی تھی۔ عرضی میں کہا گیا ہے کہ مختلف تاریخی تحریروں میں یہ درج ہے کہ زیر بحث مقام دراصل کرشنا جنم بھومی تھا اور یہاں تک کہ متھرا کی تاریخ بھی رامائن کے دور کی ہے اور اسلام صرف 1500 سال پہلے آیا تھا۔

درخواست میں یہ بھی دلیل دی گئی کہ اسلامی فقہ کے مطابق یہ مناسب مسجد نہیں ہے کیونکہ زبردستی حاصل کی گئی زمین پر مسجد نہیں بنائی جا سکتی۔عرضی میں مندر کی زمین ہندوؤں کے حوالے کرنے اور کرشنا جنم بھومی جنم استھان کے لیے مذکورہ زمین پر مندر بنانے کے لیے ایک مناسب ٹرسٹ تشکیل دینے کا مطالبہ کیا گیا تھا۔ درخواست گزار کا کہنا ہے کہ بھگوان کرشن کی پیدائش راجہ کنس کی جیل میں ہوئی تھی اور ان کی جائے پیدائش شاہی عیدگاہ ٹرسٹ کی جانب سے بنائے گئے موجودہ ڈھانچے کے نیچے ہے۔1968 میں، سوسائٹی شری کرشنا جنم استھان سیوا سنگھ نے ٹرسٹ مسجد عیدگاہ کی انتظامی کمیٹی کے ساتھ ایک معاہدہ کیا، جس میں دیوتا کی جائیداد کا ایک بڑا حصہ مؤخر الذکر کو دیا گیا۔