صہیونی ریاست کی غزہ پر بمباری،جواباً قابض بستی پر حماس کی راکٹ باری

مقبوضہ بیت المقدس،20اکتوبر:(اردودنیانیوز.کام/ایجنسیز)غزہ کی پٹی میں صیہونی قابض فوج  کی طرف سے نہتے فلسطینیوں کے خلاف ہولوکاسٹ 14 ویں دن میں داخل ہو گیا ہے۔۔شہریوں کے گھروں، رہائشی محلوں اور پناہ گاہوں پر مسلسل بمباری، نسل کشی جاری ہے اور اس بربریت کو امریکہ اور مغرب کی طرف سے قابض فوج کو مکمل معاونت حاصل ہے۔ خوفناک بمباری میں پناہ گزین کیمپ، اسکول اور مسجد کو بھی نشانہ بنایا گیا۔ بڑی تعداد میں فلسطینیوں کی شہادتیں ہوئیں۔ یاد رہے جنگ میں 3800 کے قریب فلسطینی شہید ہوچکے ہیں۔ خبر کے مطابق حماس نے جمعرات کے روز عسقلان، اسدود اور غزہ کے اطراف دیگر اسرائیلی بستیوں پر راکٹوں سے حملے کئے۔ دو راکٹ سدیروت میں جا کر گرے۔ حماس کے عسکری ونگ القسام بریگیڈز نے غزہ کی پٹی میں رعیم فوجی اڈے اور صوفا کے مقام پر راکٹوں اور مارٹروں سے بمباری کی۔قبل ازیں فلسطینی ٹیلی ویژن نے اطلاع دی تھی کہ غزہ کی پٹی کے علاقے خان یونس میں بے گھر افراد کے ایک اسکول کے قریب اسرائیلی بمباری میں متعدد افراد جاں بحق اور زخمی ہوگئے۔

غزہ پر اسرائیل کی پرتشدد بمباری میں شہید ہونے والوں کی تعداد 3800 کے لگ بھگ ہوگئی ہے۔فلسطینی میڈیا کے مطابق خان یونس پر اسرائیلی بمباری میں کم از کم 5 افراد کے جاں بحق اور درجنوں کے زخمی ہوئے۔ اس بمباری میں بڑی تعداد میں بچے شہید ہوگئے۔ میڈیا نے اس جارحیت کو نیا قتل عام قرار دیا ہے۔غزہ میں سرکاری میڈیا کے دفتر نے اطلاع دی ہے کہ پٹی میں قومی سلامتی کے کمانڈر جہاد محیسن اسرائیلی فضائی حملے کے دوران اپنے گھر میں اپنے اہل خانہ سمیت شہید ہو گئے۔

یہ بھی اطلاع دی گئی ہے کہ اسرائیلی بمباری نے خان یونس کے گنجان آباد الامل محلے کو متعدد میزائلوں سے نشانہ بنایا۔ عینی شاہدین کے مطابق اقوام متحدہ کی ریلیف اینڈ ورکس ایجنسی برائے فلسطینی پناہ گزینوں (انروا) کے قریب سکول کے آس پاس کے رہائشی مکان کو نشانہ بنایا گیا۔ اس گھر میں الامل محلے میں بے گھر افراد رہتے ہیں۔فلسطینی ریڈیو کے رپورٹ کے مطابق فلسطینی وزارت صحت کا کہنا ہے کہ تمام اسپتالوں میں ادویات کا کوئی ذخیرہ موجود نہیں ہے۔

جمعرات کو وائس آف فلسطین ریڈیو نے وزارت صحت کے حوالے سے بتایا کہ اسے جلد ہی ادویات کے مستقل طور پر ختم ہونے کا خدشہ ہے۔حماس کے عسکری ونگ عزالدین القسام بریگیڈز نے کہا ہے کہ اس نے شہریوں کیخلاف اسرائیلی قتل عام کے جواب میں جمعرات کو تل ابیب پر بمباری کی ہے۔ قبل ازیں جنوبی اسرائیل کے شہر عسقلان پر راکٹ باری کی گئی ہے۔ٹائمز آف اسرائیل اخبار کے مطابق اس لڑائی میں ہلاک ہونے والے اسرائیلی فوجیوں کی تعداد 306 ہو گئی ہے۔ اب تک 4629 اسرائیلی زخمی بھی ہوچکے ہیں۔ یروشلم پوسٹ نے اسرائیلی فوج کے ترجمان کے حوالے سے بتایا کہ غزہ کی پٹی میں اسرائیلی یرغمالیوں کی تعداد 203 ہو گئی ہے۔

---

آج رفح کراسنگ کھولنے پر اتفاق کیا گیا ہے: مصری ذرائع

قاہرہ،20اکتوبر:(اردودنیانیوز.کام/ایجنسیز) مصری ذرائع نے تصدیق کی ہے کہ غزہ کی پٹی تک امداد پہنچانے کے لیے جمعہ کو رفح کراسنگ کھولنے پر اتفاق کیا گیا ہے۔ اقوام متحدہ کے سیکرٹری جنرل انتونیو گوتریس کل کراسنگ کا دورہ کرنے والے ہیں۔ مصری صدر عبدالفتاح السیسی نے امریکی صدر جو بائیڈن سے فون پر بات چیت کے دوران غزہ کی پٹی میں انسانی صورتحال پر توجہ مرکوز کی۔رفح کراسنگ کے ذریعے غزہ کی پٹی میں انسانی امداد کو پائیدار طریقے سے پہنچانے پر اتفاق کیا گیا۔ دونوں ملکوں کے متعلقہ حکام امداد کی آمد کو محفوظ بنانے کے لیے اقوام متحدہ کی نگرانی میں بین الاقوامی انسانی تنظیموں کے ساتھ مل کر کام کریں گے۔ صدر بائیڈن نے خطے میں امن اور استحکام کے حصول کے لیے مصری قیادت کی کوششوں کا شکریہ ادا کیا۔ مصر نے اس سے قبل مطالبہ کیا تھا کہ جلد از جلد غزہ کی پٹی میں امدادی اور خوراکی امداد منتقل کی جائے۔

مصری وزیر خارجہ سامح شکری نے غزہ کی پٹی میں جلد از جلد انسانی امداد پہنچانے کی ضرورت پر زور دیتے ہوئے کہا کہ موجودہ ناخوشگوار حالات کی روشنی میں امدادی سامان کی فراہمی ایک ناگزیر ضرورت ہے۔سامح شکری نے کہا کہ غزہ کی پٹی تک امداد کی ترسیل شروع کرنے کے لیے ایک منصوبہ تیار ہے جیسے ہی اسرائیلی جانب سے کراسنگ کے آپریشن میں حائل رکاوٹیں ہٹا دی جائیں گی۔

غزہ کے مظلومین آلودہ پانی پینے پر مجبور، اسپتالوں میں ریزرو ایندھن خاتمہ کے قریب

غزہ،20اکتوبر :(اردودنیانیوز.کام/ایجنسیز) فلسطینی وزارت داخلہ کے ترجمان ایاد البزم نے جمعرات کو کہا کہ غزہ کے باشندے آلودہ پانی پی رہے ہیں۔ جس سے غزہ کی پٹی میں صحت کا بحران مزید سنگین ہونے کا خطرہ ہے۔ جب کہ اسرائیل فلسطین تنازعہ اپنے دوسرے ہفتے میں مزید خراب ہوتا جا رہا ہے۔البزم نے وزارت داخلہ کے بیانات میں مزید کہا ہے کہ غزہ کی پٹی کے اسپتالوں کو اب ریزرو ایندھن ختم ہونے سے خطرہ لاحق ہے۔ اس سے ایک اضافی تباہی آئے گی۔ غزہ کی پٹی میں شمال سے جنوب تک کوئی محفوظ مقام نہیں ہے۔فلسطینی وزارت داخلہ کے ترجمان نے کہا کہ اسرائیل غزہ میں بے گھر لوگوں سے بھرے گھروں پر بمباری کرنے پر توجہ مرکوز کر رہا ہے تاکہ سب سے زیادہ عام شہریوں کو ہلاک کیا جا سکے۔

اس سے قبل عالمی ادارہ صحت کے ریجنل ڈائریکٹر نے کہا کہ غزہ کے اسپتالوں میں نعشیں ریفریجریٹرز کی گنجائش سے زیادہ ہیں۔ اس معاملے کو ماحولیاتی آفت قرار دیا جس سے پٹی اور اس کے باہر عوامی صحت کو خطرہ لاحق ہے۔احمد المنداری نے ایک میڈیا انٹرویو میں مزید کہا کہ غزہ میں پانی سے پیدا ہونے والی بیماریاں جیسے ہیضے کے پھیلنے کا خدشہ ہے کیونکہ لوگ پینے کے پانی کی کمی کے نتیجے میں آلودہ پانی استعمال کر رہے ہیں۔انھوں نے کہا رفح کراسنگ کو نہ کھولنا ایک دوہری انسانی تباہی لائے گا۔ صورت حال کسی تاخیر کو برداشت نہیں کر سکتی۔ ہر سیکنڈ یا گھنٹہ جو کراسنگ کھولے بغیر گزر رہا ہے معصوم جانیں ضائع ہو رہی ہیں۔