گردابی طوفان ’مچونگ‘ کی تباہی ، 2 ہلاک، 144 ٹرینیں کینسل
چنئی میں اس تباہی کا منظر تب دیکھنے کو ملا جب زوردار بارش کے بعد ایک مکان منہدم ہو گیا۔
نئی دہلی، 4دسمبر :(اردودنیانیوز.کام/ایجنسیز)گردابی طوفان ’مچونگ Cyclone Michaung ‘ ابھی تمل ناڈو کے ساحل سے ٹکرایا بھی نہیں ہے اور تباہی کی شروعات ہو گئی ہے۔ چنئی میں اس تباہی کا منظر تب دیکھنے کو ملا جب زوردار بارش کے بعد ایک مکان منہدم ہو گیا۔ اس کی زد میں آنے سے دو افراد کی موت واقع ہو گئی اور دیگر ایک شخص کے زخمی ہونے کی بھی اطلاع ہے۔ اتنا ہی نہیں، تمل ناڈو کے کئی اضلاع میں زوردار بارش کے بعد متعدد گاڑیاں پانی میں بہہ گئیں۔محکمہ موسمیات نے تمل ناڈو اور پڈوچیری کے لیے بارش، طوفان اور بجلی گرنے کا الرٹ پہلے ہی جاری کر رکھا ہے۔ حکومت نے پرائیویٹ کمپنیوں سے کہا ہے کہ وہ ملازمین سے وَرک فروم ہوم کرائیں۔
جنوبی ریاستوں میں ’مچونگ‘ طوفان کے خطرہ کو دیکھتے ہوئے کئی احتیاطی اقدام بھی کیے گئے ہیں۔ مثلاً پڈوچیری اور آندھرا پردیش کے ساحلی اضلاع میں اسکولوں کو بند رکھنے کا حکم دیا گیا ہے۔ علاوہ ازیں جنوبی سنٹرل ریلوے نے 144 ٹرینیں بھی کینسل کر دی ہیں۔ یہ طوفان کسی بھی وقت تمل ناڈو کے ساحل سے ٹکرا سکتا ہے۔ یہ گردابی طوفان مشرقی ساحلی علاقوں کو بھی متاثر کر سکتا ہے۔قابل ذکر ہے کہ وزیر اعظم نریندر مودی نے اتوار کو گردابی طوفان ’مچونگ‘ کے خطرہ کو دیکھتے ہوئے کہا تھا کہ ملک کی مشرقی ساحلی ریاستوں کے ساتھ وہ لگاتار رابطے میں ہیں۔
پی ایم مودی نے تمل ناڈو، پڈوچیری، اڈیشہ اور آندھرا پردیش میں بی جے پی کارکنان سے راحت و بچاؤ کاموں میں شامل ہونے اور مقامی انتظامیہ کی مدد کرنے کی بھی گزارش کی۔قابل ذکر ہے کہ گردابی طوفان ’مچونگ‘ کا یہ نام میانمار نے دیا ہے۔ اس کا انگریزی میں تلفظ ’مگزوم‘ ہوتا ہے۔ اس لفظ کے معنی لچیلاپن اور طاقت کے ہے۔ آئی ایم ڈی کے مطابق خلیج بنگال کے اوپر تیار ہوا کے کم دباو کا علاقہ اتوار کو گردابی طوفان ’مچونگ‘ میں تبدیل ہو گیا۔ یہ شمال کی جانب بڑھے گا اور جنوبی آندھرا پردیش کے ساحل کے یکساں آگے بڑھتے ہوئے 5 دسمبر کو نیلور اور مچھلی پٹنم کے درمیان جنوبی آندھرا پردیش ساحل کو پار کرے گا۔ اس گردابی طوفان کی وجہ سے 90-80 کلومیٹر فی گھنٹہ کی رفتار سے لے کر 110 کلومیٹر فی گھنٹہ تک کی رفتار سے ہوا بہہ سکتی ہے۔
