بہار میں فلمی انداز میں سازش رچی بینک سے ایک کروڑ لوٹ کر بیوی کے نام زمین خریدلی

حاجی پور؍ پٹنہ، 4دسمبر :(اردودنیانیوز.کام/ایجنسیز)بہار کے حاجی پور میں پولیس اہلکار کے بیٹے نے بینک سے ایک کروڑ روپے لوٹ کر بیوی کے نام مہنگی زمین خرید لی ہے۔ پولیس کا کہنا ہے کہ اس واقعے میں ایک خاتون بھی ملوث ہے، جس نے ڈکیتی سے قبل بینک میں ریکی کی تھی۔ یہ واقعہ سی سی ٹی وی میں قید ہوگیا، جس کی بنیاد پر 11 ملزمان کو گرفتار کیا گیا ہے۔نیوز پورٹل ’اے بی پی‘ پر شائع خبر کے مطابق بہار کے ویشالی ضلع کے لال گنج میں واقع ایکسس بینک سے تقریباً ایک کروڑ روپے لوٹ لیے گئے۔ یہ واقعہ یکم اگست کو پیش آیا۔ اس معاملہ میں پولیس کا کہنا ہے کہ صبح جب بینک کھلا تو ایک خاتون کو ریکی کرتے ہوئے دیکھا گیا۔

اس کے کچھ دیر بعد 4 ڈاکو بینک سے ایک کروڑ روپے سے زائد کی نقدی لوٹ کر لے گئے۔ اس واقعے میں ایک پولیس اہلکار کا بیٹا بھی ملوث ہے جس نے لوٹی ہوئی رقم سے اپنی بیوی کے نام زمین خریدی تھی۔معلومات کے مطابق، ملازمین لال گنج کے ایکسس بینک میں کام شروع کرنے والے تھے۔ اسی وقت ڈاکوؤں کا ایک گروہ بینک میں گھس آیا تھا۔ سب سے پہلے ایک ڈاکو اپنی خاتون ساتھی کے ساتھ بینک کے مین گیٹ پر واقع اے ٹی ایم کے قریب پہنچا۔ اے ٹی ایم سے کیش نکالنے کے بہانے بینک میں جھانکا۔اس واقعے کی سی سی ٹی وی تصاویر میں دیکھا جا سکتا ہے کہ ریکی کرنے آئی خاتون اور ڈاکو اے ٹی ایم سے رقم نکالنے کا بہانہ کر رہے ہیں۔ اس دوران وہ بینک کے اندر جھانک کر صورتحال کو سمجھنے کی کوشش کرتے ہیں۔