آر ٹی آئی کا جواب نہ دینے والے 10 بی ڈی او کو انفارمیشن کمیشن نے کیا طلب

پٹنہ ؍مظفر پور،5جنوری :(اردودنیانیوز.کام/ایجنسیز) بہار کے مظفر پور میں 10 بی ڈی او (بلاک ڈیولپمنٹ افسر) کیخلاف انفارمیشن کمیشن نے سخت کارروائی کی ہے۔ میڈیا رپورٹس کے مطابق ان سبھی بی ڈی او کو آر ٹی آئی کے تحت طلب کی گئی جانکاری نہیں دینے کے لیے انفارمیشن کمیشن نے 24 جنوری کو حاضر ہونے کا حکم دیا ہے۔نیز ان سبھی پر 25 ہزار روپے کا جرمانہ بھی عائد کیا گیا ہے۔میڈیا رپورٹس کے مطابق صاحب گنج، بوچہا، بندرا، کٹرا، شہری، سریا، موتی پور، گائے گھاٹ، مینا پور اور مڑون بلاک کے بی ڈی او کیخلاف انفارمیشن کمیشن نے یہ کارروائی کی ہے۔ بہار ایڈمنسٹریٹو سروس کے مذکورہ افسران پر الزام ہے کہ انھوں نے ٹیچر تقرری میں ہوئی بدعنوانی کو چھپانے کے مقصد سے آر ٹی آء کا جواب نہیں دیا۔

دراصل 6 سال قبل ٹیچر تقرری سے متعلق جانکاری ’RTI‘ کے تحت مانگی گئی تھی۔ الزام ہے کہ بلاک کے بی ڈی او نے تقرری میں ہوئی بدعنوانی چھپانے کے لیے کوئی بھی جانکاری آر ٹی آئی کارکن کو دستیاب نہیں کروائی۔ بتایا جا رہا ہے کہ ویشالی ضلع کے گورول باشندہ دھننجے جھا نے آر ٹی آئی کے تحت 07-2006 میں ہوئی ٹیچر تقرری سے متعلق جانکاری مانگی تھی۔ لیکن انھیں طے وقت پر جانکاری نہیں ملی۔ اس کے بعد متعلقہ شخص نے اس کی شکایت ریاستی انفارمیشن کمشنر دفتر میں کر دی۔ اس سلسلے میں ہی تحقیقات چل رہی ہے اور 10 بی ڈی او کے خلاف کارروائی بھی کی گئی ہے۔