نئی دہلی، 3 فروری :(اردودنیانیوز.کام/ایجنسیز)مرکزی حکومت نے بھارتیہ جنتا پارٹی کے سینئر رہنما لال کرشن اڈوانی کو اعلیٰ ترین شہری اعزاز ’بھارت رتن‘ سے نوازنے کا اعلان کیا ہے۔ فن، ادب، سائنس، سماجی خدمت اور کھیل کے میدانوں میں ملک کے لیے غیر معمولی خدمات انجام دینے والے لوگوں کو بھارت رتن سے نوازا جاتا ہے۔پی ایم مودی نے اڈوانی کو اعلیٰ ترین شہری اعزاز بھارت رتن سے نوازے جانے پر خوشی کا اظہار کیا ہے۔لال کرشن اڈوانی 5 بار لوک سبھا اور 4 بار راجیہ سبھا رکن رہ چکے ہیں۔ لال کرشن اڈوانی تین بار بھارتیہ جنتا پارٹی کے صدر بھی رہ چکے ہیں۔ وہ 2002 سے 2004 تک نائب وزیر اعظم بھی رہے۔ وزیر اعظم مودی نے اس موقع پر ایک سوشل میڈیا پوسٹ میں لکھا مجھے یہ بتاتے ہوئے بہت خوشی ہو رہی ہے کہ شری لال کرشن اڈوانی جی کو بھارت رتن سے نوازا جائے گا۔ میں نے ان سے بات کی اور انہیں اس اعزاز سے نوازے جانے پر مبارکباد پیش کی ہے۔

ہمارے دور کے سب سے قابل احترام سیاست دان، ہندوستان کی ترقی میں ان کا تعاون ناقابل فراموش ہے۔ ان کی زندگی نچلی سطح پر کام کرنے سے لے کر ہمارے نائب وزیر اعظم کے طور پر ملک کی خدمت کرنے تک رہی۔ ان کی پارلیمانی سرگرمیاں ہمیشہ مثالی اور بھرپور بصیرت سے بھرپور ہیں۔ خیال رہے کہ لال کرشن اڈوانی 8 نومبر 1927 کو کراچی، پاکستان میں پیدا ہوئے تھے، تقسم ہند کے موقعہ پر اہل خانہ کے ساتھ ہندوستان آگئے تھے۔نیز اڈوانی کو 2015 میں انہیں پدم و بھوشن سے نوازا گیا ہے۔ 2002 اور 2004 کے درمیان وہ اٹل بہاری واجپائی کی حکومت میں 7ویں نائب وزیر اعظم تھے۔ ان کا شمار بی جے پی کے بانی ارکان میں ہوتا ہے۔ اڈوانی کا سیاسی کیریئر 1942 میں راشٹریہ سویم سیوک سنگھ کے کارکن کے طور پر شروع ہوا۔ یہاں سے انہوں نے ملک کے نائب وزیر اعظم بننے کا سفر کیا۔نیز بابری مسجد کی شہادت اور رام مندر تحریک کے روح رواں و سرخیل کے طور پر بھی لال کرشن اڈوانی کو جانا جاتا ہے ، اڈوانی کی قیادت میں بابری مسجد کی شہادت کے لیے پورے ملک میں ’رتھ یاترا‘ نکالی گئی تھی۔

میری زندگی اپنے لئے، نہیں’راشٹر‘ کیلئے وقف رہی ہے: اڈوانی

نئی دہلی، 3 فروری:(اردودنیانیوز.کام/ایجنسیز)بھاجپاکے سینئر رہنما اوراٹل بہاری واجپئی کے دور حکومت کے سابق نائب وزیر اعظم لال کرشن اڈوانی کو ملک کے سب سے بڑے اعزاز بھارت رتن کے لیے منتخب کیا گیا ہے۔ اس کی خود وزیر اعظم مودی نے آج صبح دی۔ اس خصوصی اعزاز سے نوازے جانے کے بعد، سینئر بی جے پی لیڈر اڈوانی نے صدر دروپدی مرمو اور وزیر اعظم نریندر مودی کا شکریہ ادا کیا ہے۔ اڈوانی نے کہا کہ یہ نہ صرف ان کے لیے بلکہ ان کے نظریات اور اصولوں کے لیے بھی اعزاز ہے۔بی جے پی کے سینئر لیڈر نے کہا کہ آر ایس ایس میں شامل ہونے کے بعد،مجھے اپنی زندگی میں جو بھی ذمہ داری ملی میں نے اپنے پیارے ملک کی لگن اور بے لوث خدمت کرنے میں ہی خوشی پائی۔

مجھے بھارت رتن دینے کے لیے میں صدر مرمو اورپی ایم مودی کا تہہ دل سے شکریہ ادا کرتا ہوں۔ اڈوانی نے کہا کہ مجھے کوئی اعتراض نہیں، یہ زندگی میری نہیں ہے۔ میری زندگی قوم کے لیے وقف ہے۔اڈوانی نے مزید کہا کہ میں اپنی پارٹی کے لاکھوں کارکنوں، رضاکاروں اور دیگر لوگوں کا تہہ دل سے شکریہ ادا کرتا ہوں جن کے ساتھ عوامی زندگی میں اپنے پورے سفر میں کام کرنے کا شرف حاصل ہوا۔ میں اپنے خاندان کے تمام افراد بالخصوص میری پیاری بیوی کملا کے تئیں دل سے شکریہ ادا کرتا ہوں۔ وہ میری زندگی میں طاقت کا سب سے بڑا ذریعہ رہی ہیں۔ میں صدر دروپدی مرمو کا تہہ دل سے شکریہ ادا کرتا ہوں۔

مجھے یہ اعزاز دینے کے لیے وزیر اعظم نریندر مودی کا بھی شکریہ۔خیال رہے کہ وزیر اعظم مودی نے سوشل میڈیا پلیٹ فارم ایکس پر لکھا کہ، قابل احترام لیڈروں میں سے ایک اڈوانی نے ہندوستان کی ترقی میں بہت بڑا تعاون کیا ہے۔ انہوں نے اپنی زندگی کا آغاز نچلی سطح پر کام کرکے کیا اور نائب وزیر اعظم کے طور پر ملک کی خدمت کی۔وزیر اعظم نے کہا کہ اڈوانی کو بھارت رتن سے نوازا جانا میرے لیے بہت جذباتی لمحہ ہے۔ انہوں نے کہا کہ اڈوانی جی نے عوامی زندگی میں خدمات کے دوران شفافیت اور دیانتداری کے لیے غیر متزلزل عہد کیا اور سیاسی اخلاقیات میں ایک مثالی معیار قائم کیا۔