وبھاکر شاستری نے بھی کانگریس سے توبہ کرکے بھگوا خیمے میں لی پناہ

نئی دہلی ،14فروری :(اردودنیانیوز.کام/ایجنسیز)لوک سبھا انتخابات سے قبل سیاست میں کافی ہلچل مچی ہوئی ہے۔ مہاراشٹر میں اشوک چوان کے کانگریس پارٹی چھوڑنے کے بعد سابق وزیر اعظم لال بہادر شاستری کے پوتے وبھاکر شاستری نے کانگریس پارٹی سے استعفیٰ دے دیا ہے۔ انہوں نے یہ معلومات سوشل میڈیا پلیٹ فارم ایکس پر پوسٹ کرکے دی۔کانگریس صدر ملکارجن کھرگے کو ٹیگ کرتے ہوئے وبھاکر شاستری نے لکھا کہ میں انڈین نیشنل کانگریس کی بنیادی رکنیت سے استعفیٰ دیتا ہوں۔

وہیں کانگریس پارٹی چھوڑنے کے اعلان کے فوراً بعد وہ بی جے پی میں شامل ہو گئے۔ اس دوران یوپی کے نائب وزیر اعلیٰ برجیش پاٹھک موجود تھے۔بی جے پی پارٹی میں شامل ہونے کے بعد وبھاکر شاستری نے کہا کہ مجھے لگتا ہے کہ پی ایم مودی کی قیادت میں میں لال بہادر شاستری کے جئے جوان، جئے کسان کے وژن کو مزید تقویت دے کر ملک کی خدمت کر سکوں گا۔

بی جے پی میں شامل ہونے کے بعد وبھاکر شاستری نے مزید کہا کہ میں پی ایم نریندر مودی، نڈا، ایچ ایم امیت شاہ، سی ایم یوگی آدتیہ ناتھ اور برجیش پاٹھک کا شکریہ ادا کرنا چاہتا ہوں جنہوں نے میرے لیے بی جے پی کے دروازے کھولے ہیں ۔ انہوں نے کہا کہ مجھے لگتا ہے کہ مجھے اپنے دادا لال بہادر شاستری کے وژن کو آگے بڑھانے کا موقع ملے گا۔ پارٹی قیادت کی ہدایت کے مطابق کام کروں گا۔ انہوں نے الزام لگایا کہ انڈیا اتحاد کا کوئی نظریہ نہیں ہے۔ اس کا مقصد صرف پی ایم مودی کو ہٹانا ہے۔

راہل گاندھی پر سوال کرتے ہوئے انہوں نے کہا کہ راہل گاندھی بتائیں کہ کانگریس کا نظریہ کیا ہے۔راشٹریہ لوک دل نے ان کے فیصلے پر ردعمل ظاہر کیا ہے۔ پارٹی لیڈر روہت اگروال نے کانگریس پارٹی پر تنقید کرتے ہوئے کہا کہ سابق وزیر اعظم لال بہادر شاستری کے پوتے وبھاکر شاستری نے کانگریس سے استعفیٰ دے دیا ہے۔ اب چند دنوں میں کانگریس پارٹی صرف اپنے شہزادے (راہل گاندھی) کے ساتھ رہ جائے گی۔