نئی دہلی :(اردودنیانیوز.کام/ایجنسیز) اتر پردیش کے بارہ بنکی میں ایک نابالغ طالبہ کے ساتھ اجتماعی عصمت دری کا معاملہ سامنے آیا ہے۔ اتر پردیش کے بارہ بنکی میں ایک نابالغ طالبہ کے ساتھ بربریت کا ویڈیو سوشل میڈیا پر وائرل ہو رہا ہے۔ اس ویڈیو کا نوٹس لیتے ہوئے پولیس نے پانچ ملزمان کو گرفتار کیا ہے۔ اس سلسلے میں متاثرہ طالبہ نے ملزمان کے خلاف شکایت درج کرائی ہے۔ پولیس نے ملزمان کے خلاف متعلقہ دفعات کے تحت مقدمہ درج کر کے معاملے کی تفتیش شروع کر دی ہے۔ یہ واقعہ ضلع کے فتح پور کوتوالی علاقے کے ایک گاؤں میں پیش آیا۔

پولیس کو دی گئی شکایت میں متاثرہ طالبہ نے بتایا کہ وہ نویں جماعت میں پڑھتی ہے۔ دو روز قبل وہ کوچنگ کے لیے گھر سے نکلی تھی۔ راستے میں اس کی ملاقات اسراولی گاؤں کے رہنے والے اپنے دوست راجو سے ہوئی۔ وہ اسے بائیک پر دمور گاؤں کے باغ میں لے گیا، جہاں ملزم نے اس کی عصمت دری کی۔ اسی دوران اس کے چار دوست آ گئے۔ ان تمام ملزمین نے مل کر اس کی پٹائی کی اور اس کی اجتماعی عصمت دری کی ویڈیو بنائی۔ واقعے کے بعد ملزم نے اس کی فحش تصاویر اور ویڈیوز بھی بنائیں۔یہی نہیں، ملزم نے اس ویڈیو کو سوشل میڈیا پر وائرل کرنے کی دھمکی دی اور منہ بند رکھنے کی ہدایت کی۔

متاثرہ لڑکی نے بتایا کہ ملزم کی دھمکی سے ڈر کر وہ اپنے دوست راجو کے ساتھ وہاں سے واپس آئی، اسی دوران یہ ویڈیو سوشل میڈیا پر وائرل ہوگیا۔ اس کی اطلاع ملتے ہی بارہ بنکی پولیس فوراً حرکت میں آئی، متاثرہ کا بیان ریکارڈ کیا اور میڈیکل کروانے کے بعد فوری چھاپہ مار کر مرکزی ملزم راجو اور اس کے چار دوستوں کو گرفتار کر لیا، فی الحال پولس معاملے کی تفتیش کر رہی ہے۔

پولیس کے مطابق ملزمان مقتولہ کے جاننے والے ہیں۔ متاثرہ کے مطابق ملزمان نے پوری تیاری کے ساتھ یہ واردات انجام دی تھی۔ ایک ملزم راجو اسے بلانے آیا۔ جبکہ وہ اس سے قبل باقی ملزمان کو جائے واردات پر بھیج چکا تھا۔ متاثرہ نے بتایا کہ اس نے بھی ملزم پر بھروسہ کیا اور اس کی موٹر سائیکل پر بیٹھ گئی۔ متاثرہ نے راجو کے دوستوں کی شناخت مہندر ورما ولد چھانگلال اجے عرف ٹنکو ولد رام کمار، ہیمراج عرف کالو ولد بھرت پرساد، راجکمار عرف راجو ولد پریم چند ساکن گڑھ گاؤں ڈمورہ کے طور پر کی ہے۔ پولیس نے اس معاملے میں اجتماعی عصمت دری، پوکسو ایکٹ، ایس سی-ایس ٹی ایکٹ اور دیگر دفعات کے تحت مقدمہ درج کیا ہے۔

راجو طالبہ کو بلیک میل کر کے لے گیا تھا

راجو طالبہ سے پہلے سے واقف تھا۔دسمبر میں راجو نے طالبہ کو ورغلا کر اس کی عصمت دری کی تھی۔ملزم نے اس کی ویڈیو بنائی تھی۔راجو نے 22 فروری کو بھی یہی ویڈیو دکھا کر طالب علم کو بلیک میل کیا تھا۔ملزم طالبہ کو موٹر سائیکل پر بٹھا کر لے گیا تھا۔اس سلسلے میں فتح پور تھانے کے انسپکٹر ڈی کے سنگھ نے بتایا کہ متاثرہ طالبہ کی شکایت پر اجتماعی عصمت دری کا معاملہ درج کیا گیا ہے۔پانچوں ملزمان کو گرفتار کرکے جیل بھیج دیا گیا ہے۔