سی پی آئی کو پرانا پین کارڈ استعمال کرنے پر انکم ٹیکس کاملا نوٹس

نئی دہلی ، 30مارچ :(اردودنیانیوز.کام/ایجنسیز)کمیونسٹ پارٹی آف انڈیا (سی پی آئی) کے جنرل سکریٹری ڈی راجہ نے کہا کہ ان کی پارٹی کو کچھ ریاستی اکائیوں کے پرانے پین کارڈ کے استعمال کی وجہ سے محکمہ انکم ٹیکس کی طرف سے نوٹس ملا ہے۔ جب ان سے پوچھا گیا کہ کیا پارٹی کو آئی ٹی کی جانب سے کسی خاص رقم کے حوالے سے کوئی نوٹس موصول ہوا ہے؟ اس پر راجہ نے وضاحت کی کہ انہیں رقم کے حوالے سے آئی ٹی کی جانب سے کوئی نوٹس نہیں ملا ہے۔

محکمہ انکم ٹیکس نے کانگریس پارٹی کو 1700 کروڑ روپے کی وصولی کا نوٹس بھیجا ہے، یہ معلومات ذرائع کے حوالے سے سامنے آئی ہے۔ دہلی ہائی کورٹ کی جانب سے ٹیکس نوٹس کو چیلنج کرنے والی پارٹی کی عرضی کو مسترد کرنے کے ایک دن بعد کانگریس کو یہ نوٹس بھیجا گیا ہے۔ تازہ ترین نوٹس اسیسمنٹ سال 2017-18 سے 2020-21 کے لیے ہے، اس میں جرمانہ اور سود دونوں شامل ہیں۔محکمہ انکم ٹیکس کے نوٹس پر کانگریس لیڈر اجے مکن کا ردعمل سامنے آیا ہے۔ انہوں نے کہا کہ محکمہ انکم ٹیکس نے اب تک کانگریس کو 1823 کروڑ روپے کا ڈیمانڈ نوٹس جاری کیا ہے۔

اس میں 1993-94 میں سیتارام کیسری کے دور سے متعلق 53.5 کروڑ روپے کا مطالبہ بھی شامل ہے۔انکم ٹیکس ڈپارٹمنٹ نے فروری میں کانگریس کے ٹیکس ریٹرن میں بے ضابطگیاں پائی تھیں۔ جس کے بعد محکمہ نے 200 کروڑ روپے کا جرمانہ عائد کیا تھا۔ انکم ٹیکس اپیلیٹ ٹریبونل نے پارٹی سے واجبات ادا کرنے کو کہا تھا اور اس کے کھاتوں کو منجمد کر دیا تھا۔ ساتھ ہی کانگریس کا کہنا ہے کہ ٹیکس ٹریبونل کا اس کے فنڈز کو منجمد کرنے کا حکم جمہوریت پر حملہ ہے، کیونکہ یہ حکم لوک سبھا انتخابات سے عین قبل دیا گیا ہے۔دہلی ہائی کورٹ نے جمعرات کو کانگریس کی طرف سے دائر کی گئی درخواستوں کو مسترد کر دیا جس میں اس کے خلاف چار سال تک ٹیکس کی دوبارہ تشخیص کی کارروائی شروع کرنے کو چیلنج کیا گیا تھا۔

سپریم کورٹ کی جانب سے انتخابی بانڈز کو منسوخ کرنے کے بعد، لوک سبھا انتخابات میں سیاسی جماعتوں کے لیے فنڈنگ ایک مرکزی مسئلہ بنتا جا رہا ہے۔ کانگریس اور دیگر اپوزیشن جماعتوں نے عدالت کے فیصلے کا خیرمقدم کیا، جس نے اس اسکیم کو ختم کردیا جس سے بی جے پی کو سب سے زیادہ فائدہ پہنچا تھا۔