شلپا شیٹی کے شوہر راج کندرا کیخلاف ای ڈی کی کارروائی

ممبئی ، 18اپریل:(اردودنیانیوز.کام/ایجنسیز)ای ڈی نے منی لانڈرنگ کیس میں اداکارہ شلپا شیٹی کے شوہر اور بزنس مین راج کندرا کے خلاف کارروائی کی ہے۔ کیس بٹ کوائن کے استعمال کے ذریعے سرمایہ کاروں کے فنڈز کی دھوکہ دہی سے متعلق ہے۔ ای ڈی نے جمعرات کو کہا کہ اس نے منی لانڈرنگ کی تحقیقات کے ایک حصے کے طور پر اداکارہ شلپا شیٹی اور ان کے شوہر راج کندرا کے پونے میں ایک بنگلہ اور ایکویٹی حصص سمیت 98 کروڑ روپے کے اثاثوں کو ضبط کیا ہے۔ای ڈی نے سوشل میڈیا پر پوسٹ کیا کہ پی ایم ایل اے، 2002 کے دفعات کے تحت، رپو سوڈان کندرا عرف راج کندرا کی 97.79 کروڑ روپے کی غیر منقولہ جائیدادوں کو عارضی طور پر ضبط کیا گیا ہے۔

پوسٹ میں بتایا گیا کہ ضبط کی گئی جائیداد میں جوہو میں واقع ایک بنگلہ بھی شامل ہے جو شلپا شیٹی کے نام پر ہے۔ پونے میں ایک بنگلہ بھی شامل ہے۔ اس کے علاوہ ای ڈی نے راج کندرا کے نام پر کچھ ایکویٹی شیئرز بھی ضبط کیے ہیں۔ای ڈی نے منی لانڈرنگ کیس میں یہ کارروائی کی ہے۔ ای ڈی نے مہاراشٹر پولس اور دہلی پولیس کی جانب سے ون ویری ایبل ٹیک پرائیویٹ لمیٹڈ اور ملزم مرحوم امیت بھردواج، وویک بھردواج، سمپی بھردواج اور مہندر بھاردواج اور دیگر کے خلاف تحقیقات شروع کی تھی۔

یہ الزام لگایا گیا تھا کہ انہوں نے ہر ماہ 10 فیصد واپسی کے جھوٹے وعدے کے ساتھ عوام سے بٹ کوائن کی شکل میں بھاری رقم (2017 میں 6,600 کروڑ روپے) جمع کی تھی۔راج کندرا کو 19 جولائی 2021 کو 11 دیگر افراد کے ساتھ مبینہ طور پر فحش فلمیں بنانے کے الزام میں گرفتار کیا گیا تھا۔ 20 ستمبر کو، کندرا کو ممبئی کی ایک عدالت نے بالغ فلم کیس میں 50،000 روپے کے مچلکے پر ضمانت دی تھی۔ کندرا کیخلاف ’ہاٹ شاٹس‘ نامی موبائل ایپ کا استعمال کرتے ہوئے مبینہ طور پر فحش فلمیں بنانے اور تقسیم کرنے کے الزامات عائد کیے گئے تھے۔ کندرا نے اپنے خلاف تمام الزامات کی تردید کی ہے اور کہا ہے کہ انہیں جھوٹا پھنسایا گیا ہے۔