سپریم کورٹ نے شاہی عیدگاہ کے سروے پر پابندی میں کی توسیع

نئی دہلی، 9اگست :(اردودنیانیوز.کام/ایجنسیز)متھرا کی شری کرشن جنم بھومی اور شاہی عیدگاہ مسجد کے سروے پر پابندی کے معاملے میں سپریم کورٹ میں جمعہ کو ہونے والی سماعت ملتوی کر دی گئی۔ اب اس معاملے کی سماعت نومبر میں ہوگی۔ جسٹس سنجیو کھنہ اور جسٹس پی وی سنجے کمار کی بنچ نے کیس کی سماعت ملتوی کرتے ہوئے کہا کہ اس معاملے پر تفصیل سے بحث کرنے کی ضرورت ہے۔ سپریم کورٹ نے یہ بھی کہا کہ حال ہی میں ہائی کورٹ نے بھی اس معاملے میں حکم جاری کیا ہے۔ اس طرف بھی توجہ کی ضرورت ہے۔ کیس کی اگلی سماعت نومبر میں ہوگی۔ تب تک سروے پر پابندی برقرار رہے گی۔اس معاملے کی سماعت آج سپریم کورٹ میں ہونی تھی۔ سپریم کورٹ نے کہا کہ 1 اگست کو الہ آباد ہائی کورٹ نے اسی معاملے میں حکم جاری کیا ہے۔

اس میں کہا گیا ہے کہ کرشنا جنم بھومی اور شاہی عیدگاہ سے متعلق 18 عرضیوں پر سماعت جاری رہ سکتی ہے۔ سپریم کورٹ نے کہا کہ اس معاملے پر ہائی کورٹ میں 12 اگست کو سماعت ہونی ہے۔ ایسی صورتحال میں تفصیلی بات چیت کے بعد ہی کوئی فیصلہ دیا جا سکتا ہے۔ہندو فریق کی جانب سے وشنو شنکر جین سپریم کورٹ میں عرضی دائر کی گئی۔ کہا گیا کہ الہ آباد ہائی کورٹ نے 1 اگست کو فیصلہ دیا ہے۔ اس کے بعد شاہی مسجد کے سروے پر پابندی سے متعلق مسلم فریق کی درخواست بے اثر ہو گئی ہے۔ ہائی کورٹ نے آرٹیکل 7 رول 11 کے حوالے سے اپنا فیصلہ سنایا تھا۔ اس میں تمام درخواستوں کو ایک ساتھ سننے کا حکم دیا گیا تھا۔

تاہم سپریم کورٹ نے جمعہ کو کہا کہ اس کیس کی سماعت اب نومبر میں ہی ہوگی۔متھرا کے شری کرشن جنم بھومی کیس میں ہندو فریق کی طرف سے 18 درخواستیں دائر کی گئیں۔ اس میں انہوں نے شاہی عیدگاہ مسجد کی زمین کو ہندؤں کی ملکیت بتایا ہے۔ ہندؤں کی طرف سے مطالبہ کیا گیا کہ یہاں عبادت کا حق دیا جائے۔ عدالت نے مختلف درخواستوں کی ایک ساتھ سماعت کے حوالے سے فیصلہ سنانا تھا۔ مسلم فریق نے آرڈر 7، رول 11 کے تحت ان درخواستوں کی برقراری پر سوالات اٹھائے اور ان کو خارج کرنے کی اپیل کی۔ مسلم فریق نے عبادت گاہوں کے قانون، وقف ایکٹ، حد بندی ایکٹ اور مخصوص قبضہ ریلیف ایکٹ کا حوالہ دیا اور ہندو فریق کی درخواستوں کو خارج کرنے کی دلیل دی۔