سرحد پار کر رہے کئی بنگلہ دیشیوں کو بی ایس ایف نے کیا گرفتار

نئی دہلی ،20اگست :(اردودنیانیوز.کام/ایجنسیز)بنگلہ دیش کی سیاسی صورتحال میں تبدیلی کے بعد ہندوستان کے ساتھ سرحد پر بدامنی کی خبریں مسلسل منظر عام پر آ رہی ہیں۔بارڈر سیکورٹی فورس (بی ایس ایف) نے ایک بار پھر ہندوستان-بنگلہ دیش سرحد کے قریب دراندازی کی کوشش کو ناکام بنا دیا ہے۔پیر کو مغربی تریپورہ ضلع میں سات بنگلہ دیشی شہریوں کو اس وقت گرفتار کیا گیا جب وہ ہندوستان میں داخل ہونے کی کوشش کر رہے تھے۔ اس سے پہلے بھی ایسے کئی معاملے سامنے آ چکے ہیں، جب بنگلہ دیشی شہری بی ایس ایف کے جوانوں کے ہاتھوں پکڑے جا چکے ہیں۔ بنگلہ دیش میں شیخ حسینہ کی حکومت کے خاتمے کے بعد بڑی تعداد میں لوگ سلامتی کے احساس میں بھارت منتقل ہو رہے ہیں۔اگرتلہ میں بی ایس ایف کے ایک سینئر افسر نے میڈیا کو بتایا کہ ایک خفیہ اطلاع کی بنیاد پر مغربی تریپورہ ضلع میں ہرناکھولا بارڈر آؤٹ پوسٹ (بی او پی) پر تعینات بی ایس ایف اہلکاروں نے 18 اور 19 اگست کی درمیانی شب سرحدی باڑ کو عبور کرے کی کوشش کی۔

بی ایس ایف کے ہاتھوں پکڑے گئے دو افراد کی شناخت بنگلہ دیش کے ضلع مولوی بازار کے رہائشی کے طور پر ہوئی ہے۔ جبکہ ایک خاتون اور ایک بچے سمیت پانچ افراد کا تعلق برہمن باڑیا ضلع سے ہے۔اس سے پہلے بھی تریپورہ کے کھوئی ضلع میں بنگلہ دیش سے دراندازی کرنے والے کچھ لوگ پکڑے گئے تھے۔ بی ایس ایف نے ایک بیان جاری کیا تھا جس میں کہا گیا تھا کہ 12 سے 15 بنگلہ دیشی شہریوں کے ایک گروپ نے دن کے وقت پہاڑمورا سرحدی چوکی کے قریب خراب موسم کا فائدہ اٹھاتے ہوئے دراندازی کی کوشش کی۔بی ایس ایف اہلکار نے بتایا کہ گرفتار افراد سے 1.5 لاکھ بنگلہ دیشی ٹکا اور 300 ڈالر بھی ضبط کیے گئے ہیں۔

دریں اثنا، مغربی تریپورہ ضلع کے منٹولی بارڈر آؤٹ پوسٹ علاقے میں براؤن شوگر کے 14 چھوٹے پیکٹوں کی اسمگلنگ کے الزام میں ایک ہندوستانی شہری کو بھی گرفتار کیا گیا ہے۔ ہندوستان بنگلہ دیش سرحد پر دراندازی کی یہ پہلی کوشش نہیں ہے۔ بی ایس ایف نے حال ہی میں ایسے کئی معاملات میں بنگلہ دیشی شہریوں کو گرفتار کیا ہے۔شیخ حسینہ کے بنگلہ دیش سے مستعفی ہونے اور ملک چھوڑنے کے بعد تریپورہ میں ہندوستان-بنگلہ دیش سرحد پر بی ایس ایف ہائی الرٹ پر ہے اور سرحد پر نگرانی بڑھا دی گئی ہے۔