وزیر اعظم مودی اور راہل گاندھی نے کی چائے پر چرچا,جانیں اپوزیشن کے کو ن کون سے ارکان پارلیمنٹ تھے موجود

نئی دہلی،9اگست :(اردودنیانیوز.کام/ایجنسیز)وزیر اعظم نریندر مودی اور کانگریس لیڈر اور لوک سبھا میں اپوزیشن لیڈر راہل گاندھی نے جمعہ (9 اگست) کو لوک سبھا میں پارلیمنٹ کے اجلاس کے ملتوی ہونے کے بعد ایک غیر رسمی ملاقات ’چائے پر چرچا‘میٹنگ میں ایک دوسرے کا استقبال کیا۔اس دوران دونوں لیڈران نے گرمجوشی سے استقبال کیا۔ اس دوران راہل گاندھی نے مرکزی وزیر راج ناتھ سنگھ سے یوکرین کی صورتحال کے بارے میں پوچھا، جس پر وزیر دفاع نے کہا کہ ہندوستان اس پر گہری نظر رکھے ہوئے ہے۔لوک سبھا ہاؤس کی کارروائی جمعہ (9 اگست) کو غیر معینہ مدت کے لیے ملتوی کر دی گئی ہے۔ گزشتہ ماہ 22 جولائی سے شروع ہونے والے اس اجلاس کی کارروائی 12 اگست تک چلنا تھی۔ لیکن، یہ جمعہ کو ہی ختم ہو گیا۔ اس دوران لوک سبھا اسپیکر نے وزیر اعظم، پارلیمانی امور کے وزراء، قائد حزب اختلاف، مختلف جماعتوں کے لیڈران اور ارکان پارلیمنٹ کا سیشن کے دوران ایوان کی کارروائی کو خوش اسلوبی سے چلانے میں تعاون کرنے پر شکریہ ادا کیا۔

اس دوران پارلیمنٹ کے اجلاس کے ملتوی ہونے کے بعد غیر رسمی چائے کی میٹنگ میں وزیر اعظم نریندر مودی اور لوک سبھا اسپیکر اوم برلا، کانگریس لیڈر اور لوک سبھا میں اپوزیشن لیڈر راہل گاندھی کے ساتھ کئی بڑے لیڈر موجود تھے۔ جس میں وزیر دفاع راجناتھ سنگھ، وزیر داخلہ امت شاہ، شہری ہوا بازی کے وزیر رام موہن نائیڈو، پیوش گوئل، پارلیمانی امور کے وزیر کرن رجیجو، ایل جے پی لیڈر چراغ پاسوان، شیوسینا کے رکن پارلیمنٹ شری کانت شندے، سماج وادی پارٹی کے رکن پارلیمنٹ دھرمیندر یادو اور دیگر موجود تھے۔18 ویں لوک سبھا کے دوسرے اجلاس کی کارروائی جمعہ کو غیر معینہ مدت کے لیے ملتوی کر دی گئی، جس میں مرکزی بجٹ 2024-25 کی منظوری کا عمل مکمل ہو گیا۔ لوک سبھا کے اسپیکر اوم برلا نے لوک سبھا اجلاس کو غیر معینہ مدت کے لیے ملتوی کرنے کا اعلان کرنے سے پہلے کہا کہ اس اجلاس میں 15 میٹنگیں ہوئیں جو 115 گھنٹے تک جاری رہیں اور ایوان کے کام کی نتیجہ خیزی 136 فیصد رہی۔