کرناٹک میں بھی عام آدمی پارٹی کی انٹری کجریوال کا خطاب، ہم کرپشن سے پاک حکومت دیں گے

نئی دہلی ،4مارچ:(اردودنیا.اِن/ایجنسیز)کرناٹک میں اس سال مئی میں ہونے والے اسمبلی انتخابات کے لیے تمام پارٹیاں تیار ہو چکی ہیں۔ حکمراں بھارتیہ جنتا پارٹی پہلے ہی ریاست میں سرگرم ہے، اسی دوران اروند کجریوال کی عام آدمی پارٹی میں داخلے نے سیاسی خدشات کو جنم دیا ہے۔ دراصل، دہلی کے وزیر اعلیٰ کجریوال نے ہفتہ کو کرناٹک میں اپنا انتخابی بگل پھونکا ہے۔ہفتہ کو اپنے پہلے جلسہ عام سے خطاب کرتے ہوئے اروند کجریوال نے بی جے پی کو نشانہ بنایا۔ بی جے پی حکومت پر کئی الزامات لگاتے ہوئے انہوں نے عوام سے اپیل کی کہ وہ پانچ سال کے لیے عام آدمی پارٹی کو بدعنوانی سے پاک حکومت دیں۔

بی جے پی حکومت پر حملہ کرتے ہوئے کجریوال نے کہا کہ ریاست میں 40 فیصد کمیشن کی حکومت چل رہی ہے۔ انہوں نے چناگیری کے بی جے پی ایم ایل اے کے بیٹے پرشانت کمار ایم وی سے 8.23 کروڑ روپے کی بے حساب نقدی کے دریافت ہونے کامعاملہ اٹھایا۔

عام آدمی پارٹی میں بدعنوانی کے لیے صفر رواداری ہے، انہوں نے پنجاب کی مثال دیتے ہوئے کہاکہ جہاں ایک وزیر اور ایک ایم ایل اے کو اے اے پی حکومت والے پنجاب میں بدعنوانی کے الزام میں جیل بھیج دیاگیا ہے۔ اس دوران کجریوال نے مرکزی وزیر داخلہ امت شاہ کو بھی نشانہ بنایا۔دریں اثنا، اے اے پی سپریمو نے بی جے پی کو نشانہ بناتے ہوئے کہا کہ بدعنوانی دوگنی ہو جاتی ہے جہاں وہ خود کو ڈبل انجن والی حکومت کہتے ہیں ۔ اس لیے ہمیں ایک نئے انجن والی حکومت کی ضرورت ہے۔ہم بدعنوانی سے پاک حکومت دیں گے، مفت بجلی اور اچھے سرکاری اسکول بنائیں گے اور معیاری تعلیم فراہم کریں گے۔