ہلدوانی تشدد کے مبینہ ماسٹر مائنڈ عبدالمالک دہلی سے گرفتار

دہرادون ،24فروری :(اردودنیانیوز.کام/ایجنسیز)کچھ ہفتے قبل اتراکھنڈ کے ہلدوانی میں شدید تشدد دیکھا گیا تھا۔ میونسپل کارپوریشن کی ٹیم مبینہ طور پر غیر قانونی مسجد اور مدرسہ کو منہدم کرنے کے لیے بن بھول پورہ گئی تھی اور اس کی وجہ سے میونسپل کارپوریشن کی ٹیم اور پولیس اہلکاروں پر مشتعل ہجوم نے شدید حملہ کیا۔اس تشدد کا مرکزی ملزم عبدالمالک قرار دیا جا رہا ہے، جو کافی عرصے سے مفرور تھا۔ آج اتراکھنڈ پولیس نے اسے دہلی سے گرفتار کیا ہے۔ملزم کے وکلاء اجے بہوگنا اور شلبھ پانڈے نے دعویٰ کیا ہے کہ عبدالمالک، جو 8 فروری سے مفرور تھا، کو اتراکھنڈ پولیس نے گرفتار کر لیا ہے۔

8 فروری کو بن بھول پورہ میں ہونے والے تشدد میں عبدالمالک کو اہم سازشی بنایا گیا تھا۔ اسی بنیاد پر پولیس اور انتظامیہ کارروائی کر رہی ہے۔ میونسپل کارپوریشن اور انتظامیہ تجاوزات توڑنے کے لیے جس جگہ گئی تھی وہ عبدالمالک کے قبضے میں تھی۔ اس وقت ہونے والے پتھراؤ اور آتش زنی میں میونسپل کارپوریشن کی 2.44 کروڑ روپے کی املاک کو نقصان پہنچا۔میونسپل کارپوریشن نے عبدالمالک کو اس کی تلافی کے لیے نوٹس بھی بھیجا تھا، لیکن کوئی جواب نہیں ملا۔ اب تحصیل کے ذریعے وصولی کا عمل شروع ہو گیا ہے۔ تحصیلدار سچن کمار نے بتایا کہ وصولی کا عمل شروع کر دیا گیا ہے، سات دن کا نوٹس دیا گیا ہے۔ جواب نہ ملنے پر غیر منقولہ جائیداد ضبط کرنے کی کارروائی کی جائے گی۔