ایکسپریس وے پر الزامات کی بوچھار: اکھلیش نے کہا، تعمیرات میں بہت بڑی دھاندلی اور ڈکیتی ہوئی ہے

لکھنؤ ، 25 جولائی:(اردودنیا.اِن/ایجنسیاں)سماج وادی پارٹی کے قومی صدر اکھلیش یادو نے بندیل کھنڈ ایکسپریس وے کے آغاز کے کچھ ہی دن بعد حکومت کو نشانہ بنایا ہے۔اکھلیش یادو نے کہا کہ بڑے لیڈر آئے اور بڑے گڑھے بن گئے۔ انہوں نے کہا کہ ایکسپریس وے میں لوٹ مار ہوئی ہے بلکہ ڈکیتی ہوئی ہے اور اس کے لیے کچھ اور الفاظ بھی استعمال کیے جا سکتے ہیں۔اکھلیش یادو ایس پی لیڈر کنچن کنوجیا کے بیٹے کو خراج عقیدت پیش کرنے قنوج ضلع کے تروا پہنچے تھے۔

اس دوران میڈیا سے گفتگو میں ان کا کہنا تھا کہ وزیراعظم نے ایکسپریس وے کا افتتاح کیا اور بتائیں کہ پانچ چھ دن بعد ہی ایکسپریس وے میں گڑھے اور دراڑیں آنا شروع ہوگئیں۔ انہوں نے پوری ریاست میں میڈیکل کالج کھولنے کے حکومت کے دعوے پر بھی سوال اٹھائے۔اکھلیش نے کہا کہ تروا میں کینسر اسپتال بنایا گیا تھا۔ بی جے پی کی پانچ سالہ حکومت آئی، ڈاکٹروں کی تعیناتی نہ ہو سکی۔ انہوں نے حکومت پر میڈیکل کالج کے انتظامات کے لیے بجٹ نہ دینے کا بھی الزام لگایا، انہوں نے کہا کہ عوام کو معلوم ہونا چاہیے کہ حکومت پیسہ کہاں لے جا رہی ہے۔