شراب پالیسی معاملے میں وزیر اعلی اروند کیجریوال کو 3 دن کی سی بی آئی حراست

نئی دہلی ، 26جون :(اردودنیانیوز.کام/ایجنسیز)راؤس ایونیو کورٹ نے بدھ کو دہلی کے مبینہ شراب گھوٹالہ معاملے میں وزیر اعلیٰ اروند کجریوال کو 3 دن کے لئے سی بی آئی ریمانڈ پر بھیج دیا۔ ساتھ ہی عدالت نے اپنے حکم میں کہا کہ سی بی آئی کو 29 جون کی شام 7 بجے سے پہلے کجریوال کو عدالت میں پیش کرنا ہوگا۔اس سے پہلے بدھ کو سی بی آئی نے مبینہ شراب گھوٹالہ معاملے میں وزیر اعلیٰ اروند کیجریوال کو گرفتار کیا تھا۔ سی بی آئی نے راؤس ایونیو کورٹ سے سی ایم کجریوال کی 5 دن کی تحویل مانگی تھی۔تاہم کورٹ نے کیجریوال کو 3 دن کے لئے سی بی آئی ریمانڈ پر بھیج دیا۔اس سے پہلے عدالت نے سی بی آئی کو وزیر اعلیٰ اروند کیجریوال کو باضابطہ طور پر گرفتار کرنے کی اجازت دی تھی۔ خصوصی جج امیتابھ راؤت کے حکم کے بعد سی بی آئی نے کیجریوال کو گرفتار کر لیا۔ مرکزی تفتیشی ایجنسی نے عدالت سے کیجریوال کو گرفتار کرنے کی اجازت دینے کی درخواست کی تھی۔

عام آدمی پارٹی (اے اے پی) لیڈر کو تہاڑ سینٹرل جیل سے عدالت میں پیش کیا گیا۔ کیجریوال دہلی کے مبینہ شراب گھوٹالے سے متعلق منی لانڈرنگ کیس کی تحقیقات کے سلسلے میں جیل میں ہیں۔ انفورسمنٹ ڈائریکٹوریٹ (ای ڈی) اس معاملے کی جانچ کر رہا ہے۔وہیں، اروند کیجریوال کی اہلیہ سنیتا کیجریوال نے ٹویٹ کیا اور کہا،‘‘اروند کیجریوال کو 20 جون کو ضمانت ملی۔ لیکن فوری طور پر ای ڈی کو ہائی کورٹ سے اسٹے مل جاتاہے۔ پھر اگلے ہی دن سی بی آئی نے انہیں ملزم بنایا اور آج گرفتار کر لیا۔ پورا نظام اس بات کو یقینی بنانے کی کوشش کر رہا ہے کہ وہ شخص جیل سے باہر نہ آئے۔ یہ قانون نہیں بلکہ آمریت ہے، ایمرجنسی ہے۔سی بی آئی کی گرفتاری کے بعدوزیراعلیٰ کجریوال نے دہلی ہائی کورٹ کے حکم کو سپریم کورٹ میں چیلنج کرنے والی عرضی واپس لے لی۔ جسٹس منوج مشرا اور جسٹس ایس وی این بھٹی کی تعطیلات والی بنچ نے کیجریوال کو اپنی عرضی واپس لینے کی اجازت دی۔ کیجریوال کی طرف سے پیش ہونے والے سینئر وکیل ابھیشیک سنگھوی نے بنچ کو بتایا کہ چونکہ ہائی کورٹ نے 25 جون کو تفصیلی حکم جاری کیا ہے، اس لیے وہ ٹھوس اپیل دائر کرنا چاہیں گے۔

سنگھوی نے بنچ کو بتایا کہ یہ پیش رفت ہر روز نئی شکل اختیار کر رہی ہے اور اب کیجریوال کو مرکزی تفتیشی بیورو (سی بی آئی) نے گرفتار کر لیا ہے۔ہائی کورٹ نے 25 جون کو دیے گئے اپنے حکم میں نچلی عدالت کے ضمانت کے حکم پر روک برقرار رکھی۔ ای ڈی کی طرف سے پیش ہوئے سالیسٹر جنرل تشار مہتا نے کہا کہ انہوں نے کیجریوال کی عرضی کا جواب دیا ہے جسے ریکارڈ پر لیا جا سکتا ہے۔ بنچ نے دلائل سنے اور کیجریوال کو اپیل دائر کرنے کی اجازت دی۔عام آدمی پارٹی (اے اے پی) لیڈر اروندکجریوال کو 21 مارچ کو ای ڈی نے گرفتار کیا تھا اور راؤس ایونیو کی عدالت نے 20 جون کو انہیں باقاعدہ ضمانت دے دی تھی۔ دہلی کے لیفٹیننٹ گورنر نے مرکزی تفتیشی بیورو (سی بی آئی) کو ایکسائز پالیسی میں مبینہ بے ضابطگیوں اور بدعنوانی کی تحقیقات کا حکم دیا تھا، جس کے بعد اسے 2022 میں منسوخ کر دیا گیا تھا۔

معاملے کی اطلاع ملتے ہی عام آدمی پارٹی کے لیڈروں نے سخت ردعمل ظاہر کیا ہے۔ ان کے مطابق اروند کیجریوال کو پھر سے پھنسانے کی سازش کی جا رہی ہے۔ جہاں ایک طرف وہ جلد ہی رہا ہونے والے تھے وہیں دوسری طرف انہیں پھنسانے کے لیے سی بی آئی نے مقدمہ درج کر کے تفتیش کے نام پر گرفتار کرنے کی تیاری شروع کر دی ہے۔

اروند کیجریوال کو ضمانت ملنے کے بعد عبوری ضمانت ختم ہونے کے بعد انہیں 2 جون کو دوبارہ تہاڑ جیل جانا پڑا۔ اس کے بعد سے عام آدمی پارٹی مسلسل احتجاج کر رہی ہے۔ ایک طرف ہائی کورٹ نے ضمانت دینے کے نچلی عدالت کے فیصلے پر روک لگا دی، وہیں دوسری طرف سی بی آئی کی تفتیش کے بعد ایسا لگتا ہے کہ کیجریوال کو جیل سے باہر آنے میں وقت لگے گا۔لیفٹیننٹ گورنر نے سنٹرل بیورو آف انویسٹی گیشن (سی بی آئی) کو دہلی ایکسائز پالیسی کی تیاری اور اس پر عمل درآمد سے متعلق مبینہ بے ضابطگیوں اور بدعنوانی کی تحقیقات کا حکم دیا تھا، جس کے بعد 2022 میں ایکسائز پالیسی کو منسوخ کر دیا گیا تھا۔

سی بی آئی اور ای ڈی کے مطابق، ایکسائز پالیسی پر نظر ثانی کے دوران بے ضابطگیاں کی گئی تھیں اور لائسنس ہولڈرز کو ناجائز فائدہ دیا گیا تھا۔ اس معاملے کی جانچ سی بی آئی نے جولائی 2022 میں دہلی کے لیفٹیننٹ گورنر کی سفارش کے بعد شروع کی تھی اور اس ایف آئی آر کی بنیاد پر ای ڈی نے منی لانڈرنگ کا مقدمہ درج کیا تھا۔

کجریوال نے عدالت میں سی بی آئی کے دعوؤں کو مسترد کردیا

نئی دہلی ، 26جون :(اردودنیانیوز.کام/ایجنسیز)سی بی آئی نے دہلی شراب پالیسی گھوٹالے میں بدھ کے روز وزیر اعلی اروند کیجریوال کو گرفتار کر لیا۔ دہلی شراب کی پالیسی اور کیجریوال کے کردار کو لے کر عدالت میں کئی دعوے بھی کئے۔ کیجریوال نے سی بی آئی کے ان دعووں کی تردید کی ہے۔اروند کیجریوال نے عدالت کو بتایا کہ میڈیا میں سی بی آئی ذرائع سے یہ بات پھیلائی جارہی ہے کہ میں نے بیان دیا ہے کہ میں نے سارا الزام منیش سیسودیا پر ڈال دیا ہے۔ کیجریوال نے کہا کہ میں نے ایسا کوئی بیان نہیں دیا ہے کہ منیش سیسودیا قصوروارہیں۔میں نے کہا کہ وہ بے قصور ہے اور میں بھی بے قصور ہوں۔ ان کا مقصد صرف میڈیا میں ہمیں بدنام کرنا ہے۔یہ سب کچھ ریکارڈ کیا جانا چاہئے تاکہ سی بی آئی ذرائع کے ذریعہ میڈیا کو لیک نہ ہو۔سی بی آئی کے دعووں پر دہلی کے وزیر اعلیٰ نے کہا کہ انہوں نے (سی بی آئی) نے صرف نیت کے بارے میں پوچھا تھا۔

میں نے کہا تھا کہ شراب کی پالیسی ریونیو بڑھانے کے لیے شروع کی گئی تھی۔ شراب کی دکانوں پر لمبی قطاریں لگ گئیں۔ میں نے سسودیا کو فون کیا اور ہدایات دیں۔ اس کے بعد انہوں نے سوال کیا کہ کیا کسی کا خیال ہے کہ شراب کی دکانوں کی نجکاری کی جائے؟ میں نے کہا کہ یہ میرا خیال نہیں تھا۔وزیر اعلیٰ نے کہا کہ منیش سسودیا بالکل بے قصور ہیں۔ میں نے انہیں کل کہا تھا کہ یہ بیہودہ الزامات ہیں۔ دیکھتے ہیں اگلے دو تین دنوں میں سی بی آئی کے ذرائع میڈیا میں کیا پلان بناتے ہیں۔کیجریوال کے وکیل نے کہا کہ ان کا خیال ہے کہ صفحہ اول پر سرخی یہ ہونی چاہیے کہ کیجریوال نے الزام منیش سسودیا پر ڈالا ہے۔ یہ لوگ اس معاملے کو سنسنی خیز بنا رہے ہیں۔ ان کا مقصد صرف سنسنی خیز سرخیاں دینا ہے۔سی بی آئی کے دعووں پر چیف منسٹر کے وکیل وویک جین نے کہا کہ یہ دراصل سی بی آئی کی بداعتمادی اور عمل کے غلط استعمال کو ظاہر کرتا ہے۔

سی بی آئی اپنے اختیارات کا غلط استعمال کر رہی ہے۔ اس پر سی بی آئی نے کہا کہ ہائی کورٹ کی جانب سے کیجریوال کی ضمانت پر روک لگانے کے بعد ہی ہم نے گرفتاری کی۔سی بی آئی کے وکیل نے کہا کہ میں اس عدالت میں پوری ذمہ داری کے ساتھ کہہ رہا ہوں کہ کیجریوال کی گرفتاری اور ریمانڈ ضروری ہے۔ اس پر عدالت نے سی بی آئی سے پوچھا کہ گرفتاری کی بنیاد کے بارے میں آپ نے کہا ہے کہ کیجریوال گواہوں کو متاثر کرسکتے ہیں۔ سی بی آئی نے کہا کہ یہ سچ ہے کہ گواہوں کو متاثر کیا گیا ہے۔

سی بی آئی کے وکیل ڈی پی سنگھ نے کہا کہ میڈیا عدالت میں موجود ہے، وہ بتائیں گے۔ سی بی آئی کے وکیل نے کہا کہ خود کجریوال نے پہلے کہا تھا کہ نئی پالیسی سسودیا کا آئیڈیا ہے۔ اس پر عدالت نے بیان دیکھنے کے بعد تبصرہ کیا کہ کیجریوال کا بیان وہ نہیں ہے جو سرکاری وکیل کہہ رہے ہیں۔ سی بی آئی کے وکیل نے کہا کہ اگر ہم اس بیان کو پڑھیں گے تو وہ مشکل میں پڑ جائیں گے۔یہ معاملہ اس وقت زور پکڑ گیا جب دہلی کے وزیر اعلیٰ نے دہلی کے سابق نائب وزیر اعلی منیش سیسودیا پر سی بی آئی کے دعووں کی تردید کی۔ عدالت نے سی بی آئی کے اس دعوے پر کہا کہ کیجریوال نے شراب پالیسی سے متعلق ساری ذمہ داری سیسودیا پر ڈال دی ہے۔ اس پر اعتراض کیا۔عدالت نے کہا کہ ہم نے دہلی کے وزیراعلیٰ کا بیان پڑھا ہے۔ اروند کیجریوال نے ایسا کوئی بیان نہیں دیا ہے۔ آپ کنوینر نے صرف اتنا کہا تھا کہ شراب کی دکانوں کی نجکاری ان کا خیال نہیں ہے۔

پورا نظام کوشش کر رہا ہے کہ کجریوال جیل سے باہر نہ آئے: سنیتا کجریوال

نئی دہلی ، 26جون :(اردودنیانیوز.کام/ایجنسیز)دہلی کے وزیر اعلی اور عام آدمی پارٹی کے سربراہ اروند کیجریوال کو سی بی آئی نے گرفتار کر لیا ہے۔ اس معاملے پر ان کی اہلیہ سنیتا کا ردعمل سامنے آیا ہے۔ سنیتا کجریوال نے بدھ کو الزام لگایا کہ پورا نظام اس بات کو یقینی بنانے کی کوشش کر رہا ہے کہ ان کے شوہر اروند کیجریوال جیل سے باہر نہ آئیں۔ سنیتا کیجریوال نے سوشل میڈیا پلیٹ فارم ایکس پر پوسٹ کیا کہ ان کے شوہر کو 20 جون کو شراب گھوٹالہ سے متعلق منی لانڈرنگ کیس میں ضمانت مل گئی تھی، لیکن انفورسمنٹ ڈائریکٹوریٹ (ای ڈی) نے فوری طور پر روک لگا دی۔ اگلے ہی دن سی بی آئی نے انہیں ملزم بنا دیا۔ اور آج انہیں گرفتار کر لیا گیا۔

پورا نظام اس بات کو یقینی بنانے کی کوشش کر رہا ہے کہ کیجریوال جیل سے باہر نہ آئے۔ یہ قانون نہیں ہے۔ بی جے پی لیڈر سمبت پاترا نے دہلی میں ایک پریس کانفرنس میں کہا کہ میڈم (سنیتا) کیجریوال نے کہا ہے کہ ای ڈی اور سی بی آئی تانا شاہی کر رہے ہیں۔ آپ ان سے کیا کہنے کی توقع رکھتے ہیں؟ حالانکہ وہ سب کچھ جانتی ہیں لیکن وہ یہ نہیں کہیں گی کہ جو ہوا وہ صحیح ہے۔ اروند کیجریوال نے ایکسائز پالیسی گھوٹالہ کیا اور سی بی آئی کی جانب سے ان کے خلاف ثبوت دکھانے کے بعد گرفتار کر لیا گیا۔ سمبت پاترا نے یہ بھی کہا کہ کوئی بیوی یا ماں یہ نہیں کہتی کہ اس کے شوہر یا بیٹے نے چوری کی ہے۔ بی جے پی لیڈر نے لالو پرساد یادو کی مثال بھی دی۔