کسان مارچ کے پیش نظر : بوانا اسٹیڈیم کو عارضی جیل میں بدلنے کی تجویز کو کجریوال نے کیا مسترد

نئی دہلی،13فروری:(اردودنیانیوز.کام/ایجنسیز) دہلی کی کجریوال حکومت نے بوانا اسٹیڈیم کو عارضی جیل بنانے کی دہلی پولیس کی تجویز کو مسترد کر دیا ہے۔ دہلی حکومت کے مطابق کسانوں کے مطالبات جائز ہیں، پرامن مظاہرہ کرنا آئین میں ہر شہری کا حق ہے۔ کسان اس ملک کی خوراک فراہم کرنے والے ہیں اور انہیں جیل میں ڈالنا درست نہیں ہے۔ ایسے میں بوانا اسٹیڈیم کو جیل میں تبدیل کرنے کی اجازت نہیں دی جاسکتی۔

واضح ہو کہ 13 فروری کو کسانوں کے دہلی چلو مارچ کی وجہ سے راجدھانی کی سڑکوں پر جام ہے۔ نیشنل ہائی وے-48 پر طویل جام ہے۔ گروگرام کے راجیو چوک سے ایمبیئنس مال دہلی بارڈر تک طویل ٹریفک جام ہے۔ یہاں گاڑیاں تقریباً 11 کلومیٹر تک رینگ رہی ہیں۔اس کے علاوہ پولیس نے دہلی گروگرام سرحد پر بھی رکاوٹیں کھڑی کر دی ہیں اور دہلی آنے والی گاڑیوں کی بھی جانچ کی جا رہی ہے۔ وہیں میرٹھ سے دہلی کے راستے این ایچ9 پر غازی پور بارڈر پر کسانوں کے داخلے کو روکنے کے لیے لوہے کی کیلیں بچھائی گئی ہیں۔ یہاں بھی کئی کلومیٹر طویل جام ہے، تاہم مغربی اتر پردیش کی کسانوں کی تنظیم بھارتیہ کسان یونین کے سربراہ مہندر سنگھ ٹکیت اس مظاہرے میں شرکت نہیں کریں گے۔